Balalar sport mektepterindegi jattyqtyrýshylardyń jalaqysy 30%-ǵa ósedi
ASTANA. KAZINFORM — Memleket basshysy «Qazaqstan Respýblıkasynyń keıbir zańnamalyq aktilerine týrıstik salany jáne balalar sportyn qoldaý máseleleri boıynsha ózgerister men tolyqtyrýlar engizý týraly» Qazaqstan Respýblıkasynyń Zańyna qol qoıdy.
Memleket basshysynyń tapsyrmasyn oryndaý aıasynda Týrızm jáne sport mınıstrligi Balalar men jasóspirimder sport mektepterin (BJSM) jan basyna shaqqandaǵy normatıvtik qarjylandyrý júıesine kóshirýdi kózdeıtin zań jobasyn ázirledi.
— Zań jobasy aıasynda BJSM jattyqtyrýshy-oqytýshylarynyń eńbekaqysyn arttyrýǵa baǵyttalǵan shara qarastyrylǵan. Atap aıtqanda, jattyqtyrýshy-oqytýshylardyń jalaqysy laýazymdyq jalaqynyń 30%-y mólsherinde ósedi. Qosymsha tólem biliktilik testileýinen ótken jáne daıarlyqtyń ulttyq standarttaryna sáıkes oqý-jattyǵý úderisin júrgizetin jattyqtyrýshy-oqytýshylarǵa beriledi, — delingen habarlamada.
Qazir elimizde 526 balalar men jasóspirimder sport mektebi jumys isteıdi. Onda 15 myńnan astam jattyqtyrýshy-oqytýshy eńbek etedi. Jyl saıyn jattyqtyrýshylardyń shamamen 30%-y biliktilik testileýinen ótedi dep josparlanǵan. Testileýdi Respýblıkalyq dene shynyqtyrý jáne sport boıynsha oqý-ádistemelik jáne taldaý ortalyǵy ótkizedi.
Jergilikti bıýdjetten qosymsha qarajat bólý Respýblıkalyq bıýdjet komıssııasynyń sheshimimen qoldaý tapty. 2026-2028 jyldarǵa 74 mlrd teńge josparlanǵan. Onyń 1,8 mlrd teńgesi jattyqtyrýshy-oqytýshylardyń jalaqysyna qosymsha tólemderge baǵyttalady. Qalǵan qarajat BJSM-derdiń materıaldyq-tehnıkalyq bazasyn nyǵaıtýǵa, balalardyń jarystar men oqý-jattyǵý jıyndaryna qatysýyna, farmakologııalyq qamtamasyz etýge, sporttyq kıim-keshek pen jabdyqtar satyp alýǵa jumsalady.
Atalǵan sharalar jattyqtyrýshy mamandyǵynyń bedelin arttyrýǵa, balalar men jasóspirimder sporty júıesine bilikti mamandardy tartýǵa jáne tájirıbeli bapkerlerdi salada ustap qalýǵa, sondaı-aq sport rezervin daıarlaýdyń turaqty júıesin qalyptastyrýǵa baǵyttalǵan.
Jan basyna shaqqandaǵy qarjylandyrý júıesine kóshý balalar men jasóspirimder sportyn keshendi túrde qoldaýǵa múmkindik beredi. Máselen, BJSM-de bir sportshyǵa jylyna orta eseppen 415 myń teńge bólinedi. Qazirgi tańda smetalyq qarjylandyrý júıesinde bul kórsetkish shamamen 233 myń teńgeni quraıdy.
Jalpy elimizdegi 526 BJSM-de 398 342 sportshy shuǵyldanady. Sport mektepterine balalar 5 jastan bastap qabyldanady.
Buǵan deıin Qazaqstanda ǵalymdardyń jalaqysy kóteriletini belgili boldy.
