Balalar sazgeri Altyn Mahanbetovanyń shyǵarmashylyq keshi ótedi
ALMATY. 22 qazan. QazAqparat - 25 qazan kúni Astanadaǵy Kongress Holl saraıynda balalar sazgeri, ustaz-prodıýser Altyn Mahanbetovanyń shyǵarmashylyq keshi ótedi.
Kesh barysynda óner juldyzdary jas ónerpazdarmen birge A.Mahanbetovanyń balalarǵa arnaǵan 23 ánin oryndaıtyn bolady. Súıemeldeýshi - «Astana» estradalyq-sımfonııalyq orkestri. Kesh qonaqtarynyń arasynda Marjan Arapbaeva, Shahızada, Gúlnur Orazymbetova, Mıras Bekjanov, Allabergen Jaqsybaev, Qaıyrjan Berdibaev, Baıan Nurmysheva, Álııa Aıýb, Qaırat Igilikov, Nurǵalı Turlybekov, Nurbol Balapanov syndy jas ánshiler bar.
Altyn Mahanbetovanyń balalar shyǵarmashylyǵyna arnaǵan 10 jyldyq mereıtoıy buǵan deıin, naqty aıtqanda, ústimizdegi jyldyń sáýir aıynda Almaty qalasynda Abaı atyndaǵy opera jáne balet teatrynda ótken edi. Kesh barysynda avtordyń 94 áni engen jınaq pen úntaspasynyń tusaýy kesilgen bolatyn.
