Balalar onkologııasy qyzmetin jetildirýdiń jol kartasy bekitildi
ASTANA. QazAqparat - QR Densaýlyq saqtaý mınıstri Eljan Birtanov Qazaqstan Respýblıkasyndaǵy Balalar onkologııasy men gemotologııasy qyzmetin jetildirý jol kartasyn bekitti, dep habarlaıdy QazAqparat.
«Jol kartasy onkologııalyq jáne gemotologııalyq aýrýlarmen syrqattanǵan balalarǵa kórsetiletin medıtsınalyq kómek sapasyn arttyrýǵa negizdelgen birqatar is-sharalardy qarastyrady. Onyń aıasynda zańnamalyq jáne normatıvtik-quqyqtyq bazany jetildirý, dıagnostıkalaý men emdeý sapasyn arttyrý maqsatynda medıtsınalyq uıymdardyń materıaldyq-tehnıkalyq bazasyn jaqsartý, gemopoetıkalyq baǵanalyq jasýshany transplanttaýdy damytý, kadrlyq áleýet deńgeıin arttyrý josparlanǵan»,-dep atap ótilgen vedomstvo málimetinde.
Sonymen qatar, onkologııalyq aýrýlardy erte kezeńde anyqtaý, qaterli isik aýrýlaryn emdeý men ońaltýdyń zamanaýı tehnologııalary boıynsha turǵyndardyń habardarlyǵy men saýattylyǵyn arttyrý sharalary qarastyrylǵan.
«Jol kartasyn iske asyrý isiktiń birqatar túrleri boıynsha onkologııalyq aýrýlarmen syrqattanǵan balalardyń tiri qalý múmkindigin 80-90 paıyzǵa deıin ulǵaıtýǵa, al qaterli isikti I-II kezeńde dıagnostıkalaýdy 50-60 paıyzǵa arttyrýǵa, sondaı-aq medıtsınalyq-áleýmettik beıimdeý men ońaltýdy, qaterli isikpen syrqattanǵan balalardyń ómir súrý sapasyn jaqsartýǵa múmkindik beredi», - deıdi QR DSM Medıtsınalyq kómekti uıymdastyrý departamenti dırektorynyń orynbasary Elmıra Ahmetova.
Esterińizge sala keteıik, aǵymdaǵy jyldyń 1 aqpanynda QR Densaýlyq saqtaý mınıstrliginiń bastamasymen balalar onkologııasy men gematologııasy máseleleri boıynsha atalǵan saladaǵy túıtkilderdi talqylaý men onyń sheshý joldarynyń ortaq is-áreketter josparyn ázirleý maqsatynda balalardyń ata-analary jáne ÚEU belsendilerimen kezdesý ótken bolatyn.
