Balalar ombýdsmeni «Darıkorn daýyna» qatysty pikir bildirdi
ASTANA. KAZINFORM — Bala quqyqtary jónindegi ýákil Dınara Zákıeva tanymal bloger vıdeosynan keıin býllıngke ushyraǵan balaǵa qatysty pikir bildirip, blogerdi qatań synǵa aldy.
Áleýmettik jelide Olga Kolýzanova esimdi qoldanýshy Daricorn atymen tanymal bloger Darıǵa Nurkeevanyń óz ulyn ruqsatsyz vıdeoǵa túsirgenin, ondaǵy kemsitý saldarynan ulynyń býllıngke ushyraǵanyn málimdedi.
Vıdeo 2024 jyldyń tamyz aıynda túsirilgen jáne mıllıondaǵan qaralym jınap, balany mazaq qylǵan kommentarııler jazylǵan. Birinshi ınstantsııa soty Qatty Tatty dámhanasyn kópshilik aldynda keshirim suraýǵa, moraldyq ótemaqy men zańger shyǵyny úshin 500 000 teńge tóleýge mindettegen. Alaıda dámhana jábirlenýshige qarsy talap aryz berip, eshbir mindettememen kelispegen.
Balalar ombýdsmeni áleýmettik jelide kún saıyn balalardyń quqyqtary óreskel buzylatynyn, olardyń jeke derekteri, fotosýretteri, vıdeolary túrli maqsatta qoldanylatynyn atap ótti.
— Al eresekter onyń saldaryn, mundaı áreketter bala psıhıkasyna qandaı nuqsan keltiretinin, onyń tutas álemge senimin buzatynyn oılamaıdy. Qara basynyń qamy úshin adamgershilik umyt qalyp otyr. Osyny jasaǵan eresekterdiń baladan keshirim surap, jaǵdaıdy túzeýge tyrysýǵa ar-namysy jetpegeni ókinishti. Mundaı áreketter balanyń ómirin qurtyp jiberýi múmkin ekenin árdaıym este saqtaý kerek, — dep jazdy D. Zákıeva.
Onyń aıtýynsha, jyl basynda balalardyń qaýipsizdigin qamtamasyz etý, olardyń foto-vıdeosyn paıdalanýǵa qatysty qylmystyq jaýapkershilikti kúsheıtýge baǵyttalǵan túzetýler ázirlendi. Jaqynda olar Úkimetke bekitýge jiberiledi.
Sonymen birge, ombýdsmen balanyń anasymen baılanysta ekenin jáne barlyq qajetti kómekti kórsetetinin aıtty.
Buǵan deıin Oqý-aǵartý mınıstrligi Balalardyń quqyqtaryn qorǵaý komıteti oqıǵa jóninde resmı túsindirme jasady. Qajet bolǵan jaǵdaıda komıtet bala quqyqtary men múddelerin qorǵaý úshin resmı túrde sot protsesine qatysýǵa daıyn.
Aıta keteıik, osydan buryn Astanada eki jasar búldirshin baqshada býllıngke ushyraǵany anyqtaldy.