Balalar ólimimen kúres baıaýlady - ıÝNISEF
ASTANA.KAZINFORM – Dúnıejúzilik densaýlyq saqtaý uıymy (DDU) men ıÝNISEF málimeti boıynsha 2024 jyly 5 jasqa deıingi 4,9 mıllıon bala, onyń ishinde 2,3 mıllıon jańa týǵan náreste kóz jumdy. Bul ólimniń kópshiliginiń aldyn sapaly medıtsınalyq kómekpen alýǵa bolatyn edi, biraq oǵan qarjylandyrý azaıyp keledi, dep habarlaıdy DW.
BUU búkil álemde balalar ólimi azaımaı turǵanyn jarııalady. Dúnıejúzilik densaýlyq saqtaý uıymy (DDU) men Birikken Ulttar Uıymynyń Balalar qorynyń (ıÝNISEF) birlesken esebine sáıkes, 2024 jyly búkil álemde 5 jasqa deıingi 4,9 mıllıon bala, onyń ishinde 2,3 mıllıon jańa týǵan náreste qaıtys bolǵan.
Eki uıymnyń málimeti boıynsha, 2000 jyldan beri bes jasqa deıingi balalar ólimi eki ese azaıǵan, biraq balalar óliminiń tómendeý qarqyny 2015 jyldan beri 60 paıyzdan astam baıaýlaǵan.
Ásirese Ońtústik Afrıkada balalar óliminiń eń joǵary deńgeıi baıqalady.
2024 jyly álemniń birneshe aımaǵynda balalar ólimi eń joǵary deńgeıge jetti. Mundaı ólimniń 58 paıyzy Ońtústik Afrıkada, 25 paıyzy Ońtústik Azııada tirkeldi. Onyń kópshiliginiń sapaly medıtsınalyq kómekpen aldyn alýǵa bolatyn edi.
Esepte aıtylǵandaı, 2024 jyly kóz jummǵan balalardyń ishinde 100 myńy azyq-túlik jetispeýshiliginen zardap shekken. Alaıda, zertteý avtorlarynyń jazýynsha, tamaqtanýdyń janama saldaryn, mysaly, onyń ımmýndyq júıege keri áserin eskersek, naqty kórsetkishter «aıtarlyqtaı joǵary».
Merziminen buryn bosaný, ınfektsııa jáne azyq-túlik jetkiliksizdigi
Jańa týǵan náresteler óliminiń negizgi sebepteri - merziminen buryn bosanýǵa baılanysty asqynýlar (jaǵdaılardyń 36%) jáne bosaný kezindegi asqynýlar (jaǵdaılardyń 21%). Ómirdiń alǵashqy aıynan keıin balalar juqpaly aýrýlardan, ásirese bezgek, sondaı-aq aýyr dıareıa men pnevmonııadan qaıtys bolady.
DDU vaktsınatsııa, ashtyqpen kúres jáne tıisti akýsherlik kómek kórsetý sııaqty «dáleldengen jáne qoljetimdi sharalardy» álemdik densaýlyq saqtaýdaǵy eń tıimdi sharalardyń qataryna jatqyzady.
Densaýlyq saqtaý qyzmetterine qoljetimdilikti arttyrý qajet
Zertteý avtorlary balalar ólimimen kúresý úshin, ásirese sapaly medıtsınalyq kómekke qoljetimdilikti jaqsartý arqyly kúsheıtilgen sharalardy qoldanýǵa shaqyrdy. ıÝNISEF atqarýshy dırektory Ketrın Rassel bul turǵyda jahandyq qarjylandyrýdyń qysqarýyn synǵa aldy.
- Eshbir bala biz aldyn ala alatyn aýrýlardan ólmeýi kerek. Biraq biz balalardyń ómir súrýindegi progrestiń baıaýlap bara jatqanynyń alańdatarlyq belgilerin kórip otyrmyz, buǵan jahandyq bıýdjettiń qysqarýy basty sebep, - dedi ol.
Biz buǵan deıin Qazaqstan men DDU semizdik epıdemııasymen kúresý úshin kúsh biriktirgenin jazǵan edik.