Balalar ólimi: Ózbekstan prezıdenti Farmatsevtıka agenttiginiń basshysyn jumysynan bosatty
TAShKENT. QazAqparat – Ózbekstan prezıdenti Shavkat Mırzıeev eldiń Farmatsevtıka salasyn damytý agenttiginiń dırektory Sardor Karıevti qyzmetinen bosatty. Bul týraly memleket basshysynyń baspasóz hatshysy Sherzod Asadov málim etti, dep habarlaıdy QazAqparat gazeta.uz saıtyna silteme jasap.
«Balalar ólimi sala jaǵdaıyn, baqylaý joqtyǵyn kórsetti. Barlyq jaýapty tulǵalar zań aldynda jaýap beredi», - dep málimdedi prezıdent.
Juma kúni ótken otyrysta prezıdent «Dok-1 Maks» dárisin qabyldaǵan balalardyń ólimine qatysty jaǵdaıdy qatty synǵa alǵan.
Eske salaıyq, Ózbekstan tumaý men sýyq tııýge qarsy úndilik «Dok-1 Maks» preparatyn satýǵa ýaqytsha tyıym salyndy. Atalǵan dári Samarqan oblysynda qaıtys bolǵan 18 balanyń ólimine sebepker bolýy múmkin. Ózbekstannyń Memlekettik qaýipsizdik qyzmeti (MQQ) osy oqıǵaǵa qatysty qylmystyq is qozǵaǵan bolatyn.
Foto: Shýhrat Latıpov / «Gazeta.uz»
