Balalar namysty qoldan bermedi – jattyqtyrýshy hokkeıdegi tarıhı jeńis týraly

Top jarǵan jas sportshylar elge abyroımen oraldy. Jeńimpazdardy elorda áýejaıynda týǵan-týystary, dostary men jankúıerleri qoshemetpen qarsy aldy.

Bıyl 66-shy ret uıymdastyrylǵan halyqaralyq balalar men jasóspirimder týrnırine álemniń 16 elinen 120 komanda qatysty. Dúbirli dodada jas talanttar muz aıdynynda ózara myqtyny anyqtady. Fınalda «Astana Team» kanadalyq qarsylastaryn býllıt serııasynda jeńip, chempıon atandy. Osylaısha, hokkeıdiń otany Kanada tórinde kók týymyz kókke kóterildi.

Tarıhı jeńiske jetken komanda quramy elimizdiń ár aımaǵyndaǵy úzdik oıynshylardan jasaqtalǵan. Jattyqtyrýshynyń aıtýynsha, ujym tolyq quramda bir ret bas qosyp, daıyndyq týrnırin ótkizgennen keıin birden chempıonatqa attanǵan.

— Oıyndar óte tartysty ári qıyn ótti. Keıbir oıynshylar dıskvalıfıkatsııaǵa baılanysty qatysa almaǵandyqtan, eki bestik qurammen jáne úsh-tórt qorǵaýshymen oınaýǵa týra keldi. Soǵan qaramastan, balalar namysty qoldan bermeı, barlyq tapsyrmany abyroımen oryndady. Qýanyshymyzda shek joq. Jigittermen birge kishkentaı baladaı qýanyp, qushaqtasyp jattyq. 10–12 myń kórermenniń aldynda ózimizdi dáleldeı aldyq, — dedi komanda jattyqtyrýshysy Vladımır Matıýhın.

Saltanatty qarsy alý rásiminde jas hokkeıshiler de qoldaý bildirgen barsha otandastaryna alǵys aıtty.

— Bul umytylmas sát. Biz hokkeıdiń otanynda jeńiske jetip, Qazaqstandy álemge tanyttyq. Qoldaýlaryńyzǵa raqmet. Memleket basshysy quttyqtaǵan kezde bárimiz qatty tańǵaldyq. Alǵashynda senbedik, qaljyń shyǵar dep oıladyq. Keıin Instagram áleýmettik jelisinen kórgende erekshe qýanyp, maqtanysh sezimi boıymyzdy kernedi, — dedi hokkeıshi Ádil Sadýaqasov.

Aıta ketelik Prezıdent Astana Team jas hokkeıshilerin jeńisimen quttyqtaǵan edi. 

Eske sala keteıik, jaqynda Hokkeıden Qazaqstan qyzdar quramasy búgin álem chempıonatynda Ońtústik Koreıamen oınaıdy.