Balalar múddesi aıasynda baspanadan shyǵarýǵa jol bermeıtin kepildikter bekitý mańyzdy - Zákıeva
ASTANA. KAZINFORM – Memleket basshysynyń usynysy balalardyń quqyqtyq qorǵalýyn kúsheıtip, bul kepildikterge turaqty sıpat beredi. Bul týraly Konstıtýtsııalyq reformalar jónindegi komıssııanyń otyrysynda Bala quqyqtary jónindegi ýákil Dınara Zákıeva aıtty.
- Búgin Úkimettiń keńeıtilgen otyrysynda Memleket basshysy Qasym-Jomart Toqaev: qazirgi Konstıtýtsııada «Turǵyn úıge qol suǵýǵa bolmaıdy. Sot sheshiminsiz turǵyn úıden aıyrýǵa jol berilmeıdi» degen erejeni «turǵyn úıden májbúrlep shyǵarýǵa» da sot sheshiminsiz jol berilmeıdi dep tolyqtyrǵan jón» dep atap ótti. Turǵyn úıge quqyq bul tek áleýmettik kepildik emes, eń aldymen, adam qaýipsizdiginiń negizgi sharty. Ásirese, balalar úshin. Halyqaralyq standarttarǵa sáıkes, balalardyń ómir súrýine, damýyna jáne quqyqtaryn qorǵaýyna eń qolaıly jaǵdaılar qamtamasyz etilýi tıis. BUU-nyń Bala quqyqtary týraly konventsııasy ár balanyń dene, psıhıkalyq jáne áleýmettik damýyna jetkilikti ómir súrýi deńgeıine, onyń ishinde qaýipsiz ári turaqty baspanaǵa quqyǵy bar ekenin moıyndaıdy. Bala úshin turǵyn úı - onyń ál-aýqatynyń mańyzdy sharttarynyń biri, - dedi D.Zákıeva.
Onyń sózine qaraǵanda, tájirıbe kórsetip otyrǵandaı, turǵyn úı qatynastary salasynda azamattardy baspadan shyǵarý kezinde olardyń quqyqtaryn shekteý qaýpi aıqyn baıqalady.
- Jumysymyzda balalardyń túrli ómirlik jaǵdaılarǵa baılanysty, onyń ishinde ata-anadan nemese asyraýshydan aıyrylǵan kezde, jalǵyz baspanadan aıyrylýy qaýpine tap bolatyn jaǵdaılarmen jıi kezdesemiz. Mysaly, bir jaǵdaıda balalardyń anasy qaıtys boldy. Bul áıel ıpotekanyń basym bóligin tólese de, balalardy jalǵyz baspadan shyǵarý qaýpi týyndady jáne buǵan deıin tólengen qarajat qaıtarylmaıtyny aıtyldy. Nátıjesinde, bul másele balalar múddesine qaraı sheshildi, bank qalǵan qaryzdy keshirý týraly sheshim qabyldady. Alaıda mundaı jaǵdaılar az emes. Osy oraıda Konstıtýtsııalyq reforma aıasynda baspanadan adamnyń ómirlik jaǵdaıyn, ásirese balalar múddesin eskermeı turǵyn úıden shyǵarýǵa jol bermeıtin qosymsha kepildikter bekitýimiz mańyzdy dep sanaımyz. Osyǵan baılanysty QR Konstıtýtsııasynyń jobasynda memlekettiń azamattardy turǵyn úımen qamtamasyz etý úshin jaǵdaı jasaýmen qatar, sottyń sheshiminsiz turǵyn úıden aıyrý jáne shyǵarýǵa jol bermeý týraly Memleket basshysynyń usynysyn qoldaımyz. Atalǵan normany Konstıtýtsııamen bekitý eń aldymen, balalardyń quqyqtyq qorǵalýyn kúsheıtip, bul kepildikterge turaqty sıpat beredi. Osylaısha, turǵyn úıge quqyq naqty ári tıimdi qorǵalý mehanızmine ıe bolady. Bul óz kezeginde áleýmettik memleket retindegi qalyptasqanymyzdyń jáne adam qadir-qasıetine degen qurmettiń aıǵaǵy, - dedi Dınara Zákıeva.
Aıta keteıik, búgin Úkimettiń keńeıtilgen otyrysynda Memleket basshysy Qasym-Jomart Toqaev Konstıtýtsııa jobasyn sot sheshiminsiz «turǵyn úıden májbúrlep shyǵarýǵa» da jol berilmeıdi dep tolyqtyrýdy usyndy.
