Balalar merekesi: Almatyda 1 maýsym kúni qaıda barýǵa bolady
ALMATY. KAZINFORM – Almatyda 1 maýsym kúni kontsert jáne festıvaldar, tanymdyq jáne mádenı-demalys baǵdarlamalary, shyǵarmashylyq sheberlik synyptary qamtıtyn aýqymdy merekelik is-sharalar ótedi.
Halyqaralyq balalardy qorǵaý kúnine arnalǵan basty oqıǵa - «BALAFEST, JARYQ SKILL FEST» festıvali bolady. Іs-shara Álııa Moldaǵulova men Mánshúk Mámetova atyndaǵy saıabaqıa saǵat 12:00-den 16:00-ge deıin ótedi. Onda balalar ekologııaǵa, mádenıetke, salt-dástúrlerge, tehnologııalarǵa jáne kásipterge arnalǵan taqyryptyq aımaqtarǵa baryp, syılyqtarǵa aıyrbastaýǵa bolatyn oıyn valıýtasyn jınaıdy.
Sonymen qatar 1 maýsymda Gorkıı atyndaǵy Ortalyq mádenıet jáne demalys saıabaǵynda «BalaStar Almaty» otbasylyq festıval-kontserti ótedi. Kontserttik baǵdarlama saǵat 11:00-de bastalady. Oǵan qazaqstandyq estrada juldyzdary - Roza Rymbaeva, Jarqynaı Hanaıym, Aıgúl Qosanova, Dınaıa, sondaı-aq «Sarmat», «Gúlstan» ansamblderi jáne «Boztorǵaı» vokaldyq stýdııasy qatysady. Qalanyń horeografııalyq stýdııalarynan 200-den astam balanyń qatysýymen «Almaty júregimde» merekelik fleshmoby usynylady.
Al Almaty Gallery kishi zalynda saǵat 12:00-de jas sýretshi Raýana Oljastyń «Meniń balalyq shaǵymnyń palıtrasy» atty jeke kórmesi ashylady. Kórme 15 maýsymǵa deıin ashyq bolady.
Bastaýysh synyp oqýshylaryna arnalǵan tanymdyq is-shara Almaty qalasynyń tarıhy murajaıynda ótedi. Kúni boıy munda «Jas arheolog» oıyny uıymdastyrylady, onyń barysynda balalar arheologııa negizderimen tanysady.
Arnaıy merekelik baǵdarlama qalalyq kitaphanalarda da ótedi. 1 maýsym kúni saǵat 10:00-den bastap Mahatma Gandı atyndaǵy saıabaqta №4 kitaphananyń qatysýymen «Almaty – baqytty balalar qalasy» atty aýqymdy mereke bastalady.
Jambyl atyndaǵy jasóspirimder kitaphanasynda №92 mamandandyrylǵan lıtseıdiń oqýshylary ádebı oqýlarǵa, baıqaýlarǵa jáne kórkemdik is-sharalarǵa qatysady. 2 maýsymda S.Begalın atyndaǵy Ortalyq qalalyq balalar kitaphanasynda teatrlandyrylǵan qoıylymmen, sheberlik synyptarymen, fleshmobpen jáne haıýanattar baǵymen baılanystyratyn «Kitap jazy» merekesi ótedi.
1 maýsymda Almaty haıýanattar baǵynyń bazasynda jazǵy zoobaq - 9 jastan 16 jasqa deıingi oqýshylarǵa arnalǵan bilim berý jobasy jumys isteı bastaıdy. Sabaqtar tegin negizde ótedi jáne ony haıýanattar baǵynyń mamandary - zoologtar, veterınarlar men pedagogtar júrgizedi. Qatysý úshin «Men nelikten Haıýanattar baǵynda oqyǵym keledi» taqyrybynda esse jazý qajet boldy.
Odan bólek 1 maýsymda merekelik is- sharalar qalanyń ár aýdanynda ótedi:
Almaly aýdanynda saǵat 12:00-de Gandı saıabaǵynda oıyndar, baıqaýlar uıymdastyrylyp, taqyryptyq balalar is-sharasy ótedi.
Alataý aýdanynda saǵat 11:00-de Zerdeli skverinde (Zerdeli shaǵyn aýdany, 180a) balalarǵa arnalǵan merekelik is-shara: kontsert, tsırk shoýy jáne anımatorlardyń qatysýymen túrli ınteraktıvti is-sharalar ótedi.
Áýezov aýdanynda saǵat 18:00-de Family park-ta ashyq aspan astyndaǵy mýltfılmniń merekelik kórsetilimi bolady.
Bostandyq aýdanynda merekelik is-sharalar (kontserttik baǵdarlama, balalar jarysy, sheberlik synyptary) Tuńǵysh Prezıdent saıabaǵynda saǵat 10:00-den bastap ótedi.
Jetisý aýdanynda saǵat 10:00-de Qulager shaǵyn aýdanynda kontserttik baǵdarlama uıymdastyrylady jáne anımatorlardyń qatysýymen «Jetisu Fest» festıvali ótedi.
Túrksib aýdanyndaǵy mereke 10:00-de Seıfýllın dańǵyly, 13/1 mekenjaıdaǵy №6 Oqýshylar úıiniń aldynda ótedi.
Medeý aýdanynda saǵat 11:00-de Ortalyq mádenıet jáne demalys saıabaǵynda balalardy kontserttik baǵdarlama kútedi.
Naýryzbaı aýdanynda saǵat 18:00-de ákimdik janyndaǵy amfıteatrda balalarǵa arnalǵan oıyn-saýyq baǵdarlamasy bar «Ashyq aspan astyndaǵy kıno» keshi ótedi.
Eske salaıyq, Memleket basshysy Almatyda ıtalııalyq saýda úıin ashýdy usyndy.