Balalar men jastar arasynda kitap oqý mádenıetin damytýǵa basymdyq beriledi
ASTANA. KAZINFORM — QR Premer-mınıstriniń orynbasary — mádenıet jáne aqparat mınıstri Aıda Balaevanyń tóraǵalyǵymen Qazaqstan Respýblıkasy Prezıdentiniń «Kitap oqý mádenıetin damytý jáne zerdeli ult qalyptastyrý jónindegi sharalar týraly» Jarlyǵyn keshendi júzege asyrý máselesine arnalǵan keńes ótti. Bul týraly Úkimet málim etti.
Jıynǵa oqý-aǵartý mınıstri Juldyz Súleımenova, Mádenıet jáne aqparat, Ulttyq ekonomıka, Jasandy ıntellekt jáne tsıfrlyq damý, Ǵylym jáne joǵary bilim, Qorǵanys, Іshki ister mınıstrlikteriniń ókilderi qatysty.
Keńes barysynda Premer-mınıstrdiń orynbasary qatysýshylardyń baıandamalaryn tyńdady. Mádenıet jáne aqparat vıtse-mınıstri Rýstam Álı keshendi jospardyń negizgi baǵyttaryn tanystyrdy. Onyń ishinde kitaphana jáne kitap isin damytý, oqýdy nasıhattaý, sondaı-aq zamanaýı tsıfrlyq ınfraqurylym qalyptastyrý jónindegi sharalar qamtylǵan.
— Qujat 9 negizgi baǵyt boıynsha 50-ge tarta is-sharany kózdeıdi. Solardyń qatarynda kitap salasyn quqyqtyq turǵydan júıeleý máselesi de bar. Sonymen qatar Mádenıet jáne aqparat mınıstrligi kitaphana salasyn jańǵyrtýǵa erekshe kóńil bólip otyr. Búginde respýblıkada 3 887 kópshilik kitaphana jumys isteıdi. Olardyń jıyntyq qory 72,5 mln-nan astam saqtaý birligin quraıdy. 2025 jyly kitaphanalarǵa kelýshiler sany rekordtyq kórsetkishke jetip, 57 mln-nan asty. Bıyl 4 kitaphana jańǵyrtylyp, 6 jańa kitaphana ashyldy. Jyl sońyna deıin elimizdiń bes óńirinde taǵy 24 kitaphanany jańǵyrtý josparlanyp otyr, — delingen habarlamada.
Aıda Balaeva kitaphanalardyń qyzmetine jan-jaqty taldaý júrgizýdi tapsyrdy. Bul jumys kitaphana ınfraqurylymy men ǵımarattarynyń jaı-kúıin, kitap qorymen qamtamasyz etilý deńgeıin, sondaı-aq ondaǵy ádebıetterge suranysty qamtýy tıis.
— Taldaý qorytyndysy boıynsha, ásirese balalar men jastarǵa arnalǵan ádebıet baǵytyndaǵy tapshylyqtardy aıqyndap, kitaphana qoryn odan ári damytý jáne jańartý jóninde naqty usynystar ázirleý qajet. Balalar men jastar arasynda oqý mádenıetin damytýǵa baǵyttalǵan sharalar týraly oqý-aǵartý mınıstri Juldyz Súleımenova baıandady. Mınıstrlik oqýshylardyń ádebıetke jáne zamanaýı oqyrman servısterine qoljetimdiligin keńeıtetin «Balalar kitaphanasy» jáne «Oqyrman» platformalaryn iske qosty. Bul baǵyttaǵy mańyzdy jumystyń biri — bilim berý uıymdarynda oqyrman klýbtarynyń qyzmetin damytý. Sonyń negizinde turaqty oqý mádenıetin qalyptastyrýǵa baǵyttalǵan «Kitap oqıtyn mektep» biryńǵaı modeli engiziledi. Atalǵan model aıasynda balalardyń kitap oqýǵa qyzyǵýshylyǵyn ata-analar men pedagogterdiń jeke ónegesi arqyly arttyrýdy kózdeıtin «Birge oqıyq» jobasy júzege asyrylady, — dep habarlady Mınıstrler kabınetinen.
Óz kezeginde ǵylym jáne joǵary bilim vıtse-mınıstri Gúlzat Kóbenova stýdent jastar arasynda kitap oqý mádenıetin ilgeriletý tásilderi týraly aıtty. Bul baǵytta joǵary oqý oryndary kitaphanalaryn damytý jáne stýdenttik oqyrman klýbtarynyń jumysyn jandandyrý máseleleri qamtylǵan. Keńes qorytyndysy boıynsha Ǵylym jáne joǵary bilim mınıstrligine salalyq ádebıettermen qamtamasyz etý deńgeıine taldaý júrgizý, sondaı-aq pedagog kadrlardy daıarlaýda qoldanylatyn oqý ádebıetteriniń mazmunyn zerdeleý tapsyryldy.
Qorǵanys jáne Іshki ister mınıstrlikterine qarasty uıymdardyń kitaphana qorlaryn zertteý jáne taldaý máselesine de erekshe nazar aýdarý qajet. Áskerı bólimder men vedomstvolyq mekemelerdi zamanaýı, mazmundy ári kásibı ádebıettermen qamtamasyz etý mańyzdy. Taldaý nátıjesinde naqty qajettilikter aıqyndalyp, kitaphana qorlaryn tolyqtyrý jáne jańartý jóninde usynystar ázirlenýi tıis.
Qazaqstanda balalar men jasóspirimder arasynda oqyrman mádenıetin damytýǵa baǵyttalǵan bastamalar júıeli túrde jalǵasyp keledi. Bıyl oqýshylarǵa qandaı jobalar, usynystar jáne tsıfrlyq quraldar qoljetimdi bolatyny jóninde myna siltemeden oqyńyz.
