Balalar men jasóspirimderge arnalǵan respýblıkalyq baıqaý ótedi
NUR-SULTAN. QazAqparat - Bıyl elordada Balalar men jasóspirimderge arnalǵan respýblıkalyq vokalıster men aspapta oryndaýshylar baıqaýy ótedi. Bul jaıynda «Qazaqkontsert» memlekettik kontserttik uıymy men «Boztorǵaı» qoǵamdyq qory arasynda yntymaqtastyq týraly memorandýmǵa qol qoıý barysynda belgili boldy, dep habarlaıdy QazAqparat tilshisi.
«Qazaqkontsert» elimizdegi eń iri mýzykalyq uıym retinde árdaıym jas talanttardy qoldaýǵa baǵyttalǵan is-sharalardy júzege asyrýda. Bıyl daryndy balalardyń mýzykalyq shyǵarmashylyǵyn nasıhattaý men qoldaý maqsatymen «Boztorǵaı» qoǵamdyq qorymen birlesip úlken jobany qolǵa almaqshymyz. Bul – Balalar men jasóspirimderge arnalǵan respýblıkalyq vokalıster men aspapta oryndaýshylar baıqaýy. Atalǵan baıqaý qazaqstandyq mádenıet keńistigindegi eleýli jobalardyń biri bolmaq. Qazaqkontsertte elimizdiń ataqty ánshileri men kásibı oryndaýshylary eńbek etetinin eskersek, talantty jasóspirimder tek óz shyǵarmashylyǵyn ortaǵa salyp qana qoımaı, tanymal óner juldyzdarynan tálim alyp, sheberlikterin shyńdaı alady. Bul baıqaý jas daryndardyń mýzykalyq óner álemine basqan alǵashqy mańyzdy qadamdarynyń biri bolmaq», - dep atap ótti «Qazaqkontsert» MKU dırektory Jeńis Seıdýllauly memorandýmǵa qol qoıý barysynda.
Uıymdastyrýshylardyń dereginshe, Respýblıkalyq baıqaý QR Mádenıet jáne sport mınıstrliginiń qoldaýymen baıqaý Abaıdyń 175 jyldyǵy aıasynda osy jyldyń kúz mezgilinde ótedi.
«Jıyrma jyldan astam ýaqyttan beri ótkizilip kele jatqan «Boztorǵaı» jobasy balalar shyǵarmashylyǵyn damytýǵa, daryndy búldirshinderdi anyqtaýǵa arnalǵan. Jyl saıyn bizdiń baıqaýlarda Qazaqstannyń túkpir-túkpirinen, alys-jaqyn shetelden 1000-nan astam jas daryn qatysady. Qanshama talantty óner juldyzdary osy «Boztorǵaı» baıqaýynda baqtaryn synap, óner jolynda bıik jetistikterge jete bildi. Olardyń qatarynda: Dımash Qudaıbergen, Alısher Karımov, Ádilhan Makın, Dınara Sýltan, Ámire, Marhaba Sabı, Erjan Maksım syndy ánshiler bar. Bıylǵy baıqaýdyń elorda tórindegi «Qazaqstan» OKZ-da ótetini bizdi erekshe qýantady», - dedi «Boztorǵaı» QQ dırektory Qarlyǵash Ábdikárimova.
Balalar men jasóspirimderge arnalǵan respýblıkalyq vokalıster men aspapta oınaýshylar baıqaýy úlken gala-kontsertpen aıaqtalyp, qatysýshylar men barsha óner súıer qaýym úshin naǵyz mýzykalyq mereke bolmaq. Uıymdastyrýshylar baıqaýdyń erejesin «Qazaqkontsert» MKU saıtynda jarııalap, oblystyq mádenıet basqarmalaryna jiberedi.
