Balalar men jasóspirimderdiń respýblıkalyq «Ulan» gazetine 80 jyl toldy
ALMATY. Naýryzdyń 17-si. QazAqparat /Erlik Erjanuly/ - «Ulan» - óskeleń urpaqtyń adal dosy, rýhanı ustazy. Bul respýblıkalyq balalar men jasóspirimder gazetiniń 80 jyldyǵyna joldaǵan Mádenıet mınıstri Muhtar Qul-Muhammedtiń quttyqtaý hatynda aıtyldy,
dep habarlaıdy QazAqparat.
«Osynaý ǵasyrǵa jýyq ýaqyt bederinde birneshe urpaq ókilderi «Ulanda» jarııalanǵan dúnıelerden sýsyndap, rýhanı nár aldy. Qanshama daryndy ulan gazettiń jas tilshisi atanyp, qalamdaryn ushtady. Ultymyzdyń barlyq ulaǵatty ul-qyzdary, mádenıet pen óner qaıratkerleriniń, saıasatkerler men ǵalymdardyń osy gazet arqyly dúnıe tanyp, qanattanǵany anyq», deıdi Mádenıet mınıstri Muhtar Abraruly. Bilim jáne ǵylym mınıstri Janseıit Túımebaev ta bul meıram - elimizdiń myńdaǵan shákirtteriniń, ustazdar qaýymynyń ortaq qýanyshy degen júrekjardy tilegin joldap otyr.
Qazaqstan Jýrnalıster odaǵy basqarmasynyń tóraǵasy Seıitqazy Mataev sonaý 1930 jyly negizi qalanǵan basylymda Sattar Erýbaev, Baýbek Bulqyshev, Málik Ǵabdýllın, Kemel Toqaev, Farıza Ońǵarsynova syndy birtýar tulǵalar eńbek etkenin aıtady. Gazet shyǵarýǵa Sáken Seıfýllın, Іlııas Jansúgirov, Beıimbet Maılın, Muhtar Áýezov, Saparǵalı Begalın, Berdibek Soqpaqbaev syndy ádebıet arystary atsalysqan. «Ulan» gazetin qalamgerler qaýymy qanattanatyn altyn uıaǵa balaýǵa bolady.
1930 jyly Ahmet Nuralınniń redaktorlyǵymen dúnıe esigin ashqan «Ulannyń» qazirgi jetekshisi Eseı Jeńisuly: «meniń 16 700 balam bar. Qazaqstanda menen kóp balaly áke joq. «Ulannyń» 80 jyldyq toıy - barsha halyqtyń toıy», deıdi óz oqyrmanyna.
