Balalar mektepke deıingi bilimmen 100 paıyz qashan qamtylady
NUR-SULTAN. QazAqparat - Halyqpen esep berý kezdesýinde Bilim jáne ǵylym mınıstri Ashat Aımaǵambetov mektepke deıingi bilim sapasyn kóterý jumysyna ekpin qoıylatynyn aıtty, dep habarlaıdy QazAqparat tilshisi.
«Qazirgi ýaqytta elimizde 10 myńnan asa mektepke deıingi bilim berý uıymdaryna 881 myń bala barady. Biraq kezekte áli 118 myń bala tur. Endigi negizgi maqsat - osy balalardy mektepke deıingi bilim jáne tárbıemen 100 paıyz qamtý. Bul deńgeıde memlekettik-jekeshelik áriptestik tetigi jaqsy jumys isteýde. Jeke balabaqshalardy jappaı ashý úshin sanıtarlyq erejeler men normalar jeńildetildi. Nátıjesinde, biz 95 paıyz qamtýǵa qol jetkizdik», - dep toqtaldy mınıstr.
Osy oraıda ol qalalar men óńirlerdiń aýdan ortalyqtarynda sybaılas jemqorlyq jaǵdaılaryn jáne kezektiliktiń qaıtalanýyn boldyrmaý maqsatynda balabaqshalarǵa joldama berý qyzmeti avtomattandyrylǵanyn atap ótti.
«Kadrlardyń sapalyq quramyn jaqsartý úshin tárbıeshiler biliktiligin arttyrýdyń biryńǵaı jańartylǵan baǵdarlamasy ázirlendi jáne engizildi. Mektepke deıingi uıymdardyń 20 paıyzynda erekshe bilim berý qajettiligi bar balalar úshin jaǵdaı jasalǵan. Olarǵa balabaqshaǵa birinshi kezekte ornalasý quqyǵy berildi», - dedi vedomstvo basshysy.
Onyń atap ótýinshe, aldaǵy ýaqytty mektepke deıingi bilim salasynda iske asyrylatyn birneshe maqsat bar.
Bul turǵyda 1 jáne 3 jastaǵy balalardyń mektepke deıingi tárbıe jáne oqytýmen qamtamasyz etý; mektepke deıingi bilim sapasyn kóterý; balalar qaýipsizdigin qamtamasyz etý; balabaqsha tárbıeshileriniń jalaqysynyń tómendigi; balabaqshalardy lıtsenzııalaýdy qaıta qarastyrý sekildi baǵyttar qamtylǵan.
