Balalar mekemelerinde sanıtarııalyq baqylaý kúsheıtildi
ASTANA. KAZINFORM — Balalardyń densaýlyǵy men qaýipsizdigin qorǵaý maqsatynda 2026 jylǵy 1 aqpannan bastap Qazaqstanda balalar mekemelerine sanıtarııalyq-epıdemıologııalyq baqylaýdyń erekshe tártibi engiziledi.
Bul týraly Ortalyq kommýnıkatsııalar qyzmetinde ótken brıfıngte QR Densaýlyq saqtaý mınıstrliginiń Sanıtarııalyq-epıdemıologııalyq baqylaý komıteti tóraǵasynyń orynbasary Maral Raqymjanova málimdedi.
Jańa tártip balalardy tamaqtandyrý, ornalastyrý, oqytý, emdeý, tárbıeleý jáne saýyqtyrý qyzmetimen aınalysatyn, memlekettik bıýdjetten qarjylandyrylatyn mekemelerge qoldanylady. Tıisti zańǵa Memleket basshysy 2025 jylǵy 4 jeltoqsanda qol qoıǵan.
Komıtet ókiliniń aıtýynsha, sońǵy jyldary balalar jıi baratyn mekemelerde sanıtarııalyq talaptar saqtalmaýy alańdaýshylyq týǵyzǵan. Burynǵy baqylaý júıesi kóbine oryn alǵan jaǵdaıdan keıin ǵana áreket etip, aldyn alý sharalary jetkiliksiz bolǵan. Sol sebepti mektepterde jappaı tamaqtan ýlaný, ınternattar men saýyqtyrý uıymdarynda sanıtarııalyq buzýshylyqtar, balalar arasynda juqpaly aýrýlardyń taralýy sııaqty problemalar kóbeıgen. Keıbir mekemelerde jalǵan vaktsınatsııa jazbalary da tirkelgen.
— Praktıkalyq taldaý kórsetkendeı, memlekettik qarjyǵa jumys isteıtin keıbir mekemelerde balalardyń qaýipsizdigi tolyq qamtamasyz etilmegen. Al tekserýler kóbine densaýlyqqa zııan kelgennen keıin ǵana júrgizilgen, — dedi Maral Raqymjanova.
Onyń aıtýynsha, burynǵy baqylaý tek aıyppul salýǵa negizdelgendikten, adal jumys isteıtin mekemelerdiń ózinde tekserýden jaltarý baıqalǵan.
— Osy olqylyqtardy joıý úshin zańnamaǵa ózgerister engizilip, erekshe baqylaý men qadaǵalaý normalary qabyldandy. Jańa tártip táýekelderdi aldyn ala anyqtaýǵa jáne balalardyń ómiri men densaýlyǵyn qorǵaýǵa baǵyttalǵan, — dedi ol.
Erekshe tártip balabaqshalarǵa, mektepterge, medıtsınalyq uıymdarǵa, ınternattarǵa, stýdenttik jataqhanalarǵa, medıtsınalyq-áleýmettik mekemelerge, balalar men sábıler úılerine qoldanylady. Baqylaý josparly jáne jospardan tys tekserýler, monıtorıng, sondaı-aq qaýip anyqtalǵan jaǵdaıda nysanǵa baryp jedel shara qoldaný arqyly júzege asyrylady.
Osyǵan deıin balalardyń densaýlyǵyn qorǵaý úshin qandaı mańyzdy sheshimder qabyldanǵany týraly jazdyq.