Balalar lagerlerine biryńǵaı talap engizildi
ASTANA. KAZINFORM — 2026 jylǵy 1 sáýirden bastap elimizde alǵash ret balalar saýyqtyrý ortalyqtarynyń qyzmetin lıtsenzııalaý júıesi engizildi.
Oqý-aǵartý mınıstrligi balalardyń jazǵy demalysyn qaýipsiz ári sapaly uıymdastyrý baǵytynda júıeli jumys istelip jatyr. 2026 jylǵy 1 sáýirden bastap elimizde alǵash ret balalar saýyqtyrý ortalyqtarynyń qyzmetin lıtsenzııalaý júıesi engizildi. Bul bastama balalardyń demalysy, oqýy jáne saýyqtyrylýy úshin biryńǵaı talaptardy qalyptastyrýǵa baǵyttalǵan.
️ Uıymdarǵa túsetin ákimshilik júktemeni azaıtyp, qujattardy jyl saıyn qaıta rásimdeý qajettiligin boldyrmaý maqsatynda lıtsenzııanyń qoldanylý merzimi bes jyl bolyp belgilendi. Bul uıymdar qyzmetiniń turaqtylyǵyn qamtamasyz etip, memlekettik baqylaýdy júıeli júrgizýge múmkindik beredi.
️ Lıtsenzııalaý balalarǵa kórsetiletin bilim berý jáne saýyqtyrý qyzmetteriniń sapasyn arttyrýǵa, sondaı-aq qaýipsiz orta qalyptastyrýǵa baǵyttalǵan. Jańa talaptarǵa sáıkes balalar saýyqtyrý ortalyqtary ınfraqurylym, kadrlyq qamtamasyz etý, medıtsınalyq qyzmet kórsetý jáne qaýipsizdik baǵyttary boıynsha belgilengen standarttarǵa saı bolýy tıis.
️ Sonymen qatar jańa júıe talaptarǵa sáıkes kelmeıtin jáne qaýipsizdik talaptaryn saqtamaıtyn beıresmı uıymdardyń qyzmetin shekteýge múmkindik beredi. Nátıjesinde qyzmet sapasy artyp, uıymdardyń jaýapkershiligi kúsheıedi.
️ Balalar saýyqtyrý ortalyqtaryna qoıylatyn negizgi lıtsenzııalyq talaptar:
* bilim berý jáne saýyqtyrý baǵdarlamalarynyń bolýy;
* bilikti pedagogıkalyq jáne medıtsınalyq kadrlarmen qamtamasyz etilýi;
* sanıtarlyq-epıdemıologııalyq talaptardyń saqtalýy;
* qaýipsizdik júıeleriniń bolýy;
* materıaldyq-tehnıkalyq bazanyń belgilengen standarttarǵa sáıkestigi.
️ Jazǵy demalysty uıymdastyrý maqsatynda óńirlerde ákimdikter janynan vedomstvoaralyq shtabtar quryldy. Vedomstvoaralyq komıssııalar balalar saýyqtyrý ortalyqtarynyń maýsymǵa daıyndyǵyna aldyn ala baǵalaý júrgizip jatyr. Al Oqý-aǵartý mınıstrliginiń bilim berý salasyndaǵy sapany qamtamasyz etý departamentteri balalar saýyqtyrý-bilim berý ortalyqtarynyń ótinimderi negizinde lıtsenzııa rásimdeýde.
️ Qabyldanǵan sharalar balalardyń demalysy men saýyqtyrylýyn qaýipsiz ári sapaly uıymdastyrýǵa, sondaı-aq elimizde bilim berý-saýyqtyrý qyzmetteriniń biryńǵaı standartyn qalyptastyrýǵa múmkindik beredi.
Aıta ketelik Densaýlyq saqtaý mınıstrligi balalar lagerlerin «kenetten tekserý» formatyna kóshetini týraly jazǵan edik.
