Balalar lagerlerin lıtsenzııalaýdy jazǵa deıin tolyq engizý qajet — Nurgúl Taý
ASTANA. KAZINFORM — Balalar lagerlerin lıtsenzııalaýdy 2026 jyldyń jazyna deıin tolyq engizý qajet. Bul týraly Májilistiń jalpy otyrysynda Úkimet basshysynyń orynbasary — Mádenıet jáne aqparat mınıstri Aıda Balaevanyń atyna saýal joldaǵan depýtat Nurgúl Taý aıtty.
— Elimizde jyl saıyn tek jaz aılarynda kóterilip, maýsym aıaqtalǵan soń qaıta umyt qalatyn ózekti másele bar. Ol — balalardyń jazǵy demalysyn uıymdastyrý jáne balalar lagerleriniń qaýipsizdigi men qyzmet sapasyn memlekettik deńgeıde júıeleý. Málimetterge súıensek, 2025 jyly respýblıkada jyl boıy jumys isteıtin 17 saýyqtyrý ortalyǵy qyzmet kórsetken. Onda 19 myńǵa jýyq bala demalǵan. Tek 2 ortalyq qana jekemenshik ıeliginde. Sondaı-aq, 192 maýsymdyq lagerde 225 myń bala demalǵan. Onyń 120-sy — memlekettik, 72-si — jeke menshik lager, — dedi depýtat.
Onyń aıtýynsha, suranysqa sáıkes jekemenshik sektor zaman talabyna saı, bala demalysyna qolaıly etip, óz jer telimderine qala syrtyndaǵy lagerler salyp jatyr. Alaıda, olardyń jumysy júıeli túrde zańdastyrylyp, bıznes sýbektileri quqyǵynyń qorǵalmaýy jáne memleket tarapynan laıyqty qoldaý tappaýy salanyń damýyn tejeýde. Sol sebepti de naryqqa tek paıdany kózdegen kásipkerler enip, materıaldyq-tehnıkalyq bazasy óte tómen, mamandarynyń kásibı quramy saı kelmeıtin balalar lagerlerin ashyp, tómen sapadaǵy qyzmet kórsetilip jatyr.
Osy oraıda ol balalardyń qaýipsiz demalysyn qamtamasyz etý úshin birqatar sharany qabyldaýdy usyndy. Atap aıtqanda, eń aldymen balalar lagerlerin lıtsenzııalaýdy keıinge qaldyrmaı, 2026 jyldyń jazyna deıin tolyq engizý qajet. Onyń talaptaryn arnaıy qurylǵan jumys tobynda jekemenshik lagerleri ókilderimen birge pysyqtap, ázirleý kerek.
— Ekinshiden — Premer-mınıstrdiń burynǵy ókimi negizindegi memlekettik úılestirý mehanızmin qaıta engizý. Qazirgi tańda balalar demalysy vedomstvoaralyq memorandýmmen ǵana retteledi. Bul jetkiliksiz. Úshinshiden — balalar lagerleri úshin jeke OKED kodyn engizý. Qazirgi jikteýde balalar lageri qonaqúı nemese baza retinde kórsetiledi, bul sala sıpatyn tolyq ashpaıdy. Tórtinshiden — jekemenshik lagerlerge memlekettik qoldaý sharalaryn engizý. Naqtyraq aıtqanda, «Damý» qory arqyly tómen paıyzdy nesıe, jan basyna shaqqan qarjylandyrý, ınfraqurylymdyq qoldaý tetikteri qajet, — dedi Nurgúl Taý.
Sonymen qatar ol besinshiden, memlekettik satyp alýda «eń tómen baǵa» prıntsıpinen, ıaǵnı dempıngten bas tartýdy usyndy.
— Altynshydan, balalar demalysyn elektrondy avtomattandyrylǵan formatta janbasylyq qarjylandyrýmen júzege asyrý usynylady. Balalar lageri — jaı ǵana maýsymdyq qyzmet emes, bul — balanyń densaýlyǵy, qaýipsizdigi jáne quqyqtarynyń saqtalý máselesi, — dedi Nurgúl Taý.
Aıta ketelik balalar lagerlerine lıtsenzııa engiziletini týraly jazǵan edik.