Balalar lagerleri men ortalyqtaryn lıtsenzııalaý tártibi ózgerdi
ASTANA.KAZINFORM — Qazaqstanda balalarǵa arnalǵan bilim berý jáne saýyqtyrý ortalyqtaryn lıtsenzııalaý tolyqtaı elektrondyq formatqa kóshti. Endi uıymdar ruqsat qujattaryn eLicense.kz portaly arqyly onlaın túrde rásimdeı alady, bul memlekettik organdarǵa barý qajettiligin joıady. Bul týraly «Ulttyq aqparattyq tehnologııalar» AQ málim etti.
Qazaqstanda balalarǵa arnalǵan bilim berý jáne saýyqtyrý ortalyqtaryn lıtsenzııalaýǵa arnalǵan qyzmet iske qosyldy. Endi uıymdar lıtsenzııa alý úshin ótinimdi elicense.kz portaly arqyly tolyqtaı onlaın formatta tapsyra alady, memlekettik organdarǵa barýdyń qajeti joq.
Elektrondyq format ruqsat qujattaryn alý tártibin jeńildetedi, uıymdardyń ýaqyt jáne ákimshilik shyǵyndaryn azaıtady, sondaı-aq úderistiń ashyqtyǵyn arttyrady.
2026 jyldan bastap Oqý-aǵartý mınıstrligi balalarǵa arnalǵan bilim berý jáne saýyqtyrý ortalyqtarynyń qyzmetine qatysty mindetti lıtsenzııalaý talaptaryn belgiledi. Jańa tártip buryn qoldanylǵan habarlama rejıminiń ornyna engizildi. Osyǵan baılanysty zańnamada qoldanylatyn termınder naqtylandy: qoldanystaǵy normalarǵa sáıkes «balalar saýyqtyrý lageri» uǵymy «balalarǵa arnalǵan bilim berý jáne saýyqtyrý ortalyǵy» ataýymen aýystyryldy. Bul ózgeris mundaı uıymdardyń qyzmeti tek saýyqtyrýmen shektelmeı, bilim berý baǵytyn da qamtıtynyn kórsetedi.
Qyzmetti paıdalaný úshin:
- kz portalynda avtorızatsııadan ótip, basty betten «Bilim» bólimin tańdaý;
- «Bastaýysh, negizgi orta, jalpy orta, tehnıkalyq jáne kásiptik, orta bilimnen keıingi bilim berý, dinı bilim berý, kámeletke tolmaǵandarǵa bilim berý - saýyqtyrý qyzmetteri salasynda bilim berý qyzmeti» qyzmetin tańdaý;
- «Kámeletke tolmaǵandarǵa bilim berý-saýyqtyrý qyzmetteri» túrin belgilep, «Kelesi» batyrmasyn basý;
- qajetti málimetterdi toltyryp, tólem jasap, ótinimdi qol qoıýdyń qoljetimdi ádisteriniń birimen rastaý.
Lıtsenzııa 5 jylǵa beriledi, ótinim 30 jumys kúni ishinde qaralady.
Jańashyldyq jyl boıy jumys isteıtin jáne maýsymdyq ortalyqtardyń barlyǵyna qatysty. Ol kámeletke tolmaǵandarǵa bilim berý jáne saýyqtyrý qyzmetin kórsetetin memlekettik jáne jekemenshik uıymdardy qamtıdy.
Lıtsenzııalyq talaptar medıtsınalyq qyzmettiń bolýyn, qaýipsizdik júıelerin, bekitilgen bilim berý jáne saýyqtyrý baǵdarlamalaryn, sanıtarlyq normalardyń saqtalýyn, balalardyń turýyna qolaıly jaǵdaı men qajetti ınfraqurylymdy qamtamasyz etýdi kózdeıdi.
Elektrondyq qyzmetti Qazaqstan Respýblıkasy Oqý-aǵartý mınıstrligi, Qazaqstan Respýblıkasy Jasandy ıntellekt jáne tsıfrlyq damý mınıstrligi jáne «Ulttyq aqparattyq tehnologııalar» AQ birlesip iske asyrdy.
Aıta keteıik, Astanada jazǵy lagerlerdiń birinshi maýsymy aıaqtaldy.
