Balalar lagerine qandaı talaptar qoıylady
Onyń aıtýynsha, balalardy saýyqtyrý mekemelerinde tamaq eki aptalyq as máziri boıynsha ázirlenedi. Ondaı sharanyń negizgi maqsaty - taǵamdardy qaıtalamaý.
"Máselen, keshki astan qalǵan tamaqty tańǵy asta qaıta bermes úshin eki aptalyq as máziri ázirlenedi. Ony mekeme ákimshiligi rásimdep otyrýy shart. Sosyn balalar jemis-jıdek, shyryn jáne taǵy basqa paıdaly tamaqty kóbirek jesin degen maqsat bar. As mázirine gazdalǵan, tátti, alkogolsyz sýsyndardy, fast-fýdtardy, qytyrlaq kartoptardy, qaımaq, maıonez aralastyrylǵan salattardy jáne sanıtarlyq qaǵıdalarmen tyıym salynǵan basqa da tamaq ónimderin qosýǵa bolmaıdy", - dedi J.Bekshın Astanada ótken baspasóz máslıxatynda.
Onyń sózine qaraǵanda, basty talaptardyń biri - aýyz sý rejımin saqtaý. Lagerde grafın, kýler, dıspenser sııaqty taza sý saqtaıtyn ydystar kóp bolýy shart. Al tósek jabdyqtary 7 kúnde 1 ret nemese lastanýyna qaraı aýystyrylady.
"Aptasyna bir ret balalardy monshaǵa aparyp turý qajet. Sosyn kún saıyn dýshqa túsý úshin jaǵdaı jasalýy shart. Basseın men sý qoımalaryn taza kúıinde saqtaý kerek. Sý qoımalarynyń tereńdigi - 70-130 sm. Árıne, balalar shomylǵanda medıtsına qyzmetkeri men bapkerler qasynda júrýi tıis. Ata-analar osy talaptarǵa basa nazar aýdarsa deımiz. Eger qandaı da bir tártip buzýshylyqtar bolsa, onda qoǵamdyq densaýlyqty saqtaý komıtetine 8 (7172) 74-18-64 telefony boıynsha xabarlasýǵa bolady", - dep atap kórsetti J.Bekshın.
Aıta keteıik, J.Bekshın jaz kezinde toı taǵamdaryn daıyndaý qaýipsizdigine de toqtaldy. Onyń aıtýynsha, aldymen aspazdardyń kásibı daıyndyǵyn tekserip alý qajet. Bas aspazda sanıtarlyq kitapsha bolýy tıis. Syrttan adam tartýǵa bolmaıdy. Ydys-aıaqty jýyp turatyn adamdardyń sany da jetkilikti bolýy shart.
"Sosyn tamaqty saqtaıtyn arnaıy qural-jabdyqtardyń bar-joǵyn tekserip alǵan jón. Daıyn turǵan tamaq tońazytqyshta saqtalýy qajet. Meıramxanada ystyq sý bolýy tıis. Tazalyqqa basa mán berý kerek. Negizi, tamaq jasaıtyn jerdiń sanıtarlyq jaǵdaıy jappaı ýlanýǵa sebep bolyp jatady. Toıdyń dastarqanyn bir saǵat buryn jasaǵan durys. Odan erte jaıylsa, daıyn tamaqta mıkroaǵzalar tez ósedi. Sodan adam ýlanady. Árıne, tamaq ónimderiniń saqtaý merzimin únemi baqylap otyrý qajet", - dep atap kórsetti J.Bekshın.
Budan bólek, Bas sanıtarlyq dáriger toıda jappaı ýlanýdyń basty sebebin atady.
Qoǵamdyq densaýlyqty saqtaý komıteti jazǵy demalys kezinde birqatar memleketterde vırýstardyń órship turǵanyn eskertedi.
Foto: jas.kz