Balalar quqyǵyn qorǵaý: 2025 jyly Astanada 11 981 is tirkelgen
ASTANA. KAZINFORM — Kámeletke tolmaǵandardyń quqyqtary men zańdy múddelerin qorǵaýǵa baılanysty ister bir jyl ishinde 100-ge azaıǵan. 2024 jyly sotqa 12 085 is, al 2025 jyly 11 981 is túsken.
Bul jóninde Astana qalasynyń kámeletke tolmaǵandar isteri jónindegi mamandandyrylǵan aýdanaralyq sotynyń tóraıymy Leıla Zınasheva málimdedi. Onyń sózinshe, sot protsesi bastalǵanǵa deıin erli-zaıyptylar tegin psıhologııalyq kómek pen medıatordyń qoldaýyna júgine alady. Sonyń arqasynda tatýlastyrý rásimderi oń nátıjesin bergen.
— 2025 jyly 3 380 is medıatıvtik kelisimdermen jáne taraptardyń tatýlasýymen aıaqtaldy. Sotqa aryz berý aldynda 200-den astam otbasy tatýlasty, 4 665 medıatıvtik kelisim sottan tys jasaldy, — dedi aýdanaralyq sot tóraıymy.
Statıstıka az-kem jaqsarǵanmen, balalardyń quqyǵyna qatysty máseleler túp-tamyrymen joıylyp ketken joq. Máselen, kámeletke tolmaǵandardyń múliktik quqyǵyn qorǵaýǵa baılanysty birqatar sheshim qabyldanǵan.
— 2025 jyly alıment óndirip alý maqsatynda 2 131 sot buıryǵy shyǵarylǵan. Bul — jalpy ister sanynyń 17,7%-y. Sondaı-aq, kelip túsken isterdiń arasynda eń kóp taraǵany — nekeni buzý týraly talaptar, olardyń úlesi — 54,7%, — dedi Leıla Zınasheva.
Sondaı-aq, L. Zınasheva quqyqtyq aǵartý salasynda atqarylyp jatqan jumystarǵa toqtaldy.
— Zamanaýı tehnologııalardy engizý jáne quqyqtyq kómektiń qoljetimdiligin arttyrý sheńberinde baǵdarlamalaý kolledjiniń stýdentteriniń qoldaýymen jasandy ıntellekt elementteri bar «Otbasy kómek» veb-platformasy ázirlendi. Platforma ıývenaldy sot tóreliginiń mindetterine, quqyqtyq aqparattyń qoljetimdiligin arttyrýǵa jáne daýlardy beıbit jolmen sheshýge járdemdesýge baǵyttalǵan, — dedi L. Zınasheva.
Eske salaıyq, buǵan deıin kámeletke tolmaǵandar isteri jónindegi komıssııa byltyr 7000-nan astam isti qaraǵanyn habarlaǵan edik.
