Balalar koronavırýsty jeńil ótkizgenmen, ózgelerge juqtyrady – Aıjan Esmaǵambetova

NUR-SULTAN. QazAqparat –QR DSM Sanıtarlyq-epıdemıologııalyq baqylaý komıtetiniń tóraıymy Aıjan Esmaǵambetova mektepterge balalar ne sebepti meılinshe azyraq barýy kerektigin túsindirdi, dep habarlaıdy QazAqparat tilshisi.

«Balany qashyqtan oqytý-oqytpaýdy ata-ana sheshedi. Mektepterde ne sebepti meılinshe azyraq bala oqýy kerektigin túsindirip kóreıin. Qazir epıdemıologııalyq jaǵdaı turaqsyz ekenin aıtyp óttim. Balalar koronavırýsty jeńil kóteretini týraly aqparattar bar. Bul, rasymen solaı. Biraq olar muǵalim úshin de, otbasy músheleri úshin de ınfektsııa kózi bolyp qalady», - dedi Aıjan Esmaǵambetova búgin Ortalyq kommýnıkatsııalar qyzmetinde ótken brıfıngte.

Komıtet basshysy balalar koronavırýsty jeńil ótkizgenimen, onyń ózgelerge qaýpi týraly eskertti.

«Qaraǵandylyq muǵalim Reseıde koronavırýs juqtyryp, mektepke barǵan. Oqýshylar muǵalimnen aýrý juqtyryp, olardan otbasy múshelerine juqqan. Bul – balalar aýrýdy jeńil ótkizgenmen, ınfektsııany basqalarǵa da juqtyratynyn bildiredi. Al egde jastaǵy ári sozylmaly aýrýy bar adamdar bul indetti juqtyrǵan kezde emdelýi qıyn ekenin, tipti sońy ólimmen aıaqtalǵan jaǵdaılar bar ekenin bilesizder. Sondyqtan biz bul derttiń taralýyn toqtatýǵa úlken mán beremiz», - deıdi ol.