Balalar kontenti kreatıvti ındýstrııanyń mańyzdy baǵytyna aınalmaq
ASTANA. KAZINFORM — Kreatıvti ındýstrııalardy damytý qory talanttardy qoldap, jańa jobalardy iske asyrýǵa jáne otandyq ónimdi halyqaralyq naryqqa shyǵarýǵa basymdyq berip keledi. Qordyń búgingi jumysy men aldaǵy josparyn basqarýshy dırektor Almas Saǵynuly Jibek Joly telearnasynyń «Búgin Live» baǵdarlamasynda bólisti.
Onyń aıtýynsha, búginde Qazaqstandaǵy kreatıvti ındýstrııa 12 negizgi baǵytty qamtıdy. Onyń ishinde IT men geımdevelopment, kıno, anımatsııa, sáýlet, sán ındýstrııasy, fotoóner jáne qolóner salalary qarqyndy damyp keledi. Eń kóp kreator Almaty, Túrkistan jáne Qaraǵandy oblystarynda tirkelgen. Al Astana, Almaty jáne Shymkent bul kórsetkish boıynsha kósh bastap tur.
— Kreatıvti habtar Qazaqstannyń barlyq 20 óńirinde ashyldy. Bul jumys eki jyl ishinde aıaqtaldy. Sonyń nátıjesinde kreatıvti ınfraqurylym óńirlerde de qoljetimdi bola tústi. Sonymen qatar Májiliste kreatıvti ındýstrııaǵa qatysty 43 ekonomıkalyq qyzmet túriniń qorǵalýy da salanyń damýyna serpin berdi, — dedi Almas Saǵynuly.
Ol kreatıvti ındýstrııaǵa kórsetiletin memlekettik qoldaý jyldan-jylǵa artyp kele jatqanyn atap ótti. 2022 jyly Kreatıvti ındýstrııany damytý tujyrymdamasy qabyldansa, búginde Astana Hub arqyly IT-startaptarǵa qarjylyq jáne bilim berý qoldaýy kórsetilýde. Sondaı-aq jasandy ıntellekt, anımatsııa jáne geımdev baǵyttary qarqyndy damyp keledi. Tsıfrlyq platformalardyń keńeıýi qazaqstandyq oryndaýshylardyń álemdik aýdıtorııaǵa shyǵýyna jol ashsa, kıno óndirisi jańa jobalarmen turaqty túrde tolyqtyrylyp otyr.
Qor balalarǵa arnalǵan qazaq tilindegi kreatıvti kontentti kóbeıtýdi de basym baǵyttardyń biri retinde aıqyndaǵan. Bul baǵytta kitaptar, ıllıýstratsııalar men anımatsııalyq jobalardy qoldaýǵa erekshe nazar aýdarylyp otyr.
— Balalar kontentine kóbirek mán berý kerek. Jaqynda 13 jastaǵy qyz qazaq tilinde boıamaq ázirledi. Mundaı jobalar bizdiń naryqta áli de az, — dedi ol.
Osy bastamanyń jalǵasy retinde qor «Qyzyl Book Art: Dala qazynasy» respýblıkalyq sýret baıqaýyn ótkizip jatyr. Baıqaý Qyzyl kitapqa engen janýarlar men ósimdikter taqyryby arqyly oqýshylardyń tabıǵatty qorǵaýǵa degen qyzyǵýshylyǵyn arttyrýǵa baǵyttalǵan. Oǵan elimizdiń barlyq óńirinen 1–11 (12)-synyp oqýshylary qatysa alady. Jumystar úsh jas sanaty boıynsha qabyldanyp, zamanaýı óner, street art jáne eksperımentaldy baǵyttardy qamtıdy.
— Ótinim qabyldaý 5 maýsym men 27 shilde aralyǵynda júrgiziledi. Baıqaý qorytyndysynda úzdik jumystardan Qazaqstannyń Qyzyl kitabyna engen janýarlar men ósimdikterge arnalǵan «Qyzyl Book Art: Dala qazynasy» art-kitaby jaryq kóredi, — dedi Almas Saǵynuly.
Eske salaıyq, Creative Aimaq jobasy aıasynda Soltústik Qazaqstan oblysynyń kreatorlary 4,9 mln teńgeniń ónimin satty.
