Balalar kıberbýllıngimen kúres: Onlaın-platformalar týraly zań qabyldandy
Zańnyń maqsaty – Qazaqstan Respýblıkasynda onlaın-platformalardyń qyzmeti úshin quqyqtyq negiz qurý.
«Zańda onlaın-platformalar jáne onlaın-jarnama salasyndaǵy memlekettik retteý tártibin belgileý, onlaın-platformalardyń jumys isteýiniń quqyqtyq rejımin jáne onlaın-jarnamaǵa qoıylatyn talaptardy aıqyndaý, onlaın-platformalardy paıdalanýshylardyń quqyqtary men mindetterin reglamentteý usynylǵan. Zańmen «onlaın-platformany paıdalanýshy» jáne «ınflıýenser (bloger)» anyqtamalarymen qatar, basqa da termınder engizildi. Zań normalary memlekettik tildegi onlaın-platformalar ınterfeısin damytýǵa baǵyttalǵan. Búgingi tańda barlyq onlaın platformalar ınterfeısti qazaq tilinde paıdalanýǵa múmkindik bermeıdi, paıdalanýshy kelisimimen tolyq tanysýǵa qarapaıym múmkindik joq», - dedi senator Aıgúl Qapbarova.
Onyń aıtýynsha, qujatta onlaın-platformalarda jalǵan aqparatty taratýǵa jáne ornalastyrýǵa tyıym salý, sondaı-aq onlaın-platformanyń menshik ıesine ony joıý boıynsha talaptar engiziledi. Sondaı-aq zańda onlaın ortany qaýipsiz jáne ashyq túrde damytý eskerilgen. Azamattardyń ótinishteri negizinde býllıng pen óshpendi rıtorıkany qamtıtyn mazmunmen kúresýge múmkindik beretin normalar engizilgen.
Ýákiletti organnyń nusqamasy negizinde Qazaqstan Respýblıkasynyń aýmaǵynda quqyqqa qaıshy kontentti, balaǵa qatysty kıberbýllıng dep tanylǵan aqparatty ornalastyratyn jáne taratatyn akkaýnttar qyzmetin toqtata turý mindeti engiziledi.
Al ilespe zań zańnamalyq aktilerdi «onlaın-platformalar jáne onlaın-jarnama týraly» Zańǵa sáıkes keltirý maqsatynda maquldandy. Atap aıtqanda, «onlaın-platforma» jáne «onlaın-jarnama» uǵymdaryn engizýge baılanysty Qylmystyq, Kásipkerlik kodeksterge, «Qazaqstan Respýblıkasyndaǵy Bala quqyqtary týraly», «Jarnama týraly», «Bilim týraly», «Aqparattandyrý týraly» zańdarǵa túzetýler engiziledi.
