Balalar qaýipsizdigi men onlaın-platformalar: Quryltaı jańa zań jobasyn maquldady

ASTANA. KAZINFORM – Búgin Quryltaı otyrysynda «Qazaqstan Respýblıkasynyń keıbir zańnamalyq aktilerine onlaın-platformalar jáne mass-medıa máseleleri boıynsha ózgerister men tolyqtyrýlar engizý týraly» jáne «Qazaqstan Respýblıkasynyń Ákimshilik quqyq buzýshylyq týraly kodeksine onlaın-platformalar jáne mass-medıa máseleleri boıynsha ózgerister men tolyqtyrýlar engizý týraly» zań jobalary birinshi oqyymda maquldandy.

Vozrastnoe ogranıchenıe dlıa regıstratsıı v sotssetıah vvedýt v Kazahstane
Foto: Kazinform

Depýtat Janarbek Áshimjannyń aıtýynsha, zań jobasy mynalardy kózdeıdi:
– jedel habarlar servısterin qospaǵanda, paıdalanýshylardy áleýmettik jelilerde 16 jasqa deıin tirkeýge tyıym salý;
– onlaın-platformalardyń ókildikterin Qazaqstan Respýblıkasynyń zańnamasynda belgilengen tártippen mindetti eseptik tirkeý;
– aýdıovızýaldy platforma uǵymy jáne olardyń operatorlary qyzmetiniń tártibi engiziledi;
– ýákiletti organǵa 5 myńnan astam jazylýshysy, aýdıtorııasy bar onlaın-platformalarda paıdalanýshylar tizilimin júrgizý quzyreti beriledi;
– onlaın-platformalarda paıdalanýshylardyń bilim berý kýrstaryn nemese belgili bir saladaǵy oqytý materıaly bar kontentti taratý kezinde osyndaı kontentti dıplom nemese sertıfıkat málimetterimen, tıisti bilimniń bar ekendigi týraly habarlamamen súıemeldeý mindeti belgilenedi;
– «okkýlttik qyzmetter» uǵymy engiziledi, ıaǵnı tabıǵattan tys, paranormaldy nemese ǵylymı turǵydan rastalmaǵan qabiletter týraly málimdemelerge negizdelgen qyzmetter. Bul rette osy qyzmetter týraly kontent onyń oıyn-saýyqtyq sıpaty jáne ǵylymı nemese praktıkalyq turǵydan rastalmaǵany týraly eskertýmen súıemeldenýge tıis;
– ınternet-basylymdy esepke qoıý nemese qaıta esepke qoıý kezinde qorlaý sıpatyndaǵy elementteri bar onyń domendik ataýyn jáne BAQ ataýyn paıdalanýǵa jol bermeý bóliginde BAQ úshin talaptar belgilenedi;
– memlekettik organnyń resmı jaýaptaryn buqaralyq aqparat quraldarynyń tańbalaýdy júzege asyrý mindeti de bar;
– teleradıoarnalardy erkin qol jetkiziletin teleradıoarnalar tizbesine engizgen kúnnen bastap kúntizbelik 30 kún ishinde olardyń habar taratýdy uıymdastyrý jónindegi mindetterin qarastyrý kózdelgen;
– zańǵa qaıshy kontentti taratqany úshin onlaın-platformalardyń ákimshilik jaýapkershiligin zańnamalyq bekitý bar;
– ýákiletti organnyń Qazaqstan Respýblıkasynyń aýmaǵyndaǵy onlaın-platformada quqyqqa qaıshy kontentti joıý jónindegi nusqamalaryn onlaın-platforma ókildiginiń oryndamaǵany úshin ákimshilik jaýapkershilik kózdelgen;
– buqaralyq aqparat quraldarynda jáne onlaın-platformalarda balaǵat sózder aıtqany úshin jaýapkershilik bar;
– mass-medıa jáne onlaın-platformalar salasyndaǵy salalyq zańnamany qoldanystaǵy normalaryna sáıkes keltirý qarastyrylǵan.

Al depýtat Aleksandr Danılovtyń aıtýynsha, tsıfrlyq álem kún saıyn ózgerip otyrady jáne zańnama osy syn-qaterlerge jaýap berýi tıis.

- Jańa zań jobalarynyń basty maqsaty – ınternette tártip ornatý, zańdardy zamanaýı medıany damytýǵa beıimdeý jáne azamattardy qaýipti mazmun men aldaýdan qorǵaý. Aqparattyq keńistik ómirimizdiń ajyramas bóligine aınalǵandyqtan, ol da shynaıy ómirdegideı qaýipsiz ári rettelgen bolýy kerek, - dedi ol.

Zań jobalary jeliniń barlyq múshesi úshin ashyq erejelerdi belgileıdi jáne birneshe negizgi qadamdy qamtıdy Atap aıtqanda, balalardyń qaýipsizdigi. 16 jasqa tolmaǵan jasóspirimderge áleýmettik jelilerde tirkelýge tyıym salynady. Bul rette ata-analarymen jáne dostarymen baılanysýǵa arnalǵan kádimgi messendjerler olarǵa tolyq qoljetimdi bolyp qalady.
Platformalardyń Qazaqstan Respýblıkasynyń zańdaryn saqtaýy. Sheteldik áleýmettik jeliler men beıneservıster elimizde resmı ókildikterin ashýǵa mindetti bolady. Zańǵa qaıshy materıaldardy taratý jáne memlekettik organdardyń talaby boıynsha tyıym salynǵan aqparatty joıýdan bas tartqany úshin platformalarǵa ákimshilik jaýaptylyq engiziledi.
Beıneservıster men iri blogerlerge arnalǵan erejeler. Zań strımıngtik platformalardyń jumysyna qatysty standarttardy naqty aıqyndaıdy. Sonymen qatar belgili bir paraqshalar men arnalardyń resmı tizilimin engizý usynylady.

Jalǵan sarapshylardan qorǵaý. Internette oqytý kýrstaryn ázirleıtin jáne satatyn avtorlar óz biliktiligin dıplommen nemese sertıfıkatpen rastaýǵa mindetti bolady. Paıdalanýshylar spıkerdiń naqty bilimi bar-joǵyn anyq bilýi kerek.

Ezoterıka salasyndaǵy ashyqtyq. Okkýlttik qyzmetterdiń resmı uǵymy engiziledi. Bal ashý jáne tabıǵattan tys tájirıbeler týraly kez kelgen kontentke nemese jarnamaǵa onyń ǵylymı dáleli joq, tek oıyn-saýyq sıpatyndaǵy aqparat ekeni týraly naqty belgi qoıý usynylady.

- Buqaralyq aqparat quraldaryna qorlaıtyn ataýlar men domendik ataýlardy qoldanýǵa tyıym salynady. Al jańa tegin tele- jáne radıoarnalar ruqsat alǵannan keıin bir aı ishinde efırge shyǵýǵa mindetteledi. Sondaı-aq memlekettik organdardyń resmı jaýaptaryn arnaıy belgileý usynylady. Zań jobasynda BAQ pen onlaın-platformalarda balaǵat sózder qoldanǵany úshin jaýapkershilik qarastyrylǵan. Bul zań jobasyn qabyldaý ýaqtyly ári qajetti qadam dep esepteımin. Ol zańsyz kontenttiń taralýyn azaıtýǵa, balalardy ınternettegi qaýip-qaterden qorǵaýǵa, azamattardy alaıaqtardan saqtaýǵa jáne elimizdiń árbir turǵyny úshin qaýipsiz ári ádil tsıfrlyq orta qalyptastyrýǵa múmkindik beredi, - dedi depýtat.

Buǵan deıin Mádenıet jáne aqparat mınıstri Arman Qyryqbaev zań jobalarynyń negizgi baǵyttaryn ataǵan edi.