Balalar kardıologtarynyń tapshylyǵy qalaı sheshiledi
«Náreste óliminiń sebepteriniń jalpy qurylymynda jıiligi boıynsha ekinshi oryndy týa bitken damý kemistikteri (úlesi 21,6%) quraıdy. Olardyń arasynda júrek-qantamyr júıesiniń kemistikteri (úlesi 44,1%) basym. Qazirgi ýaqytta balalar kardıologtarynyń tapshylyǵy 23, balalar kardıohırýrgtarynyń tapshylyǵy 7, balalar anestezıolog- reanımatologtardyń (perfýzıologtardyń) tapshylyǵy 108 birlikti qurap otyr. Bilikti mamandarmen qamtamasyz etý maqsatynda jyl saıyn rezıdentýrada klınıkalyq mamandyqtar boıynsha kadrlar daıarlaýǵa memlekettik bilim berý tapsyrysy bólinedi. Bıyl «Kardıologııa, onyń ishinde balalar kardıologııasy» mamandyǵy boıynsha 88, «Kardıohırýrgııa, onyń ishinde balalar kardıohırýrgııasy» mamandyǵy boıynsha 19, «Balalar anestezıologııa – reanımatologııa» mamandyǵy boıynsha 111 túlek oqýyn aıaqtaıdy. 2020 jyly «Kardıologııa, onyń ishinde balalar kardıologııasy» mamandyǵy boıynsha 65, «Kardıohırýrgııa, onyń ishinde balalar kardıohırýrgııasy» mamandyǵy boıynsha 7 túlek jumysqa ornalastyryldy», - delingen Úkimet basshysynyń senatorlardyń resmı saýalyna berilgen jaýabynda.
Onyń atap ótýinshe, medıtsına kadrlaryn yntalandyrý jolymen bilikti mamandarmen qamtamasyz etý úshin júıeli sharalar qabyldanýda. Atap aıtqanda, medıtsına qyzmetkerleriniń jalaqysy kóterilýde. Sondaı-aq Memleket basshysynyń tapsyrmasy boıynsha 2023 jylǵa qaraı dárigerlerdiń jalaqysyn kezeń-kezeńmen kóterý, onyń ekonomıkadaǵy ortasha jalaqyǵa araqatynasyn 2,5 esege deıin jetkizý kózdelgen. Medıtsına qyzmetkerleriniń mártebesin arttyrý jáne olardyń qyzmetin kásibı qorǵaýdy qamtamasyz etý boıynsha zańnamalyq is-sharalar qabyldanýda. Aýyldyq eldi mekenderge kelgen jas mamandardy áleýmettik qoldaý qamtamasyz etiledi. Medıtsına kadrlaryn daıarlaý jáne olardyń biliktiligin arttyrý júıesi kúsheıtilýde.
«Densaýlyq saqtaý salasyn medıtsına kadrlarymen qamtamasyz etý máseleleri Úkimettiń otyrysynda qaralyp, ákimdikterge medıtsına qyzmetkerlerin materıaldyq yntalandyrý boıynsha sharalar qabyldaý týraly tapsyrmalar berildi. Balalarǵa kardıohırýrgııalyq kómekti jetildirý maqsatynda balalar jasyndaǵy patsıentterde ókpe gıpertenzııasy baǵdarlamasyn júrgizý jáne «Júrektiń jalǵyz qarynshasy bar patsıentterge arnalǵan baǵdarlama» mýltıpándik komandasyn qurý josparlanýda», - dedi Asqar Mamın.
