Balalar hırýrgi: Eń kishkentaı patsıentim – 500 gramdyq sábı
NUR-SULTAN. QazAqparat – 600-700 gramm salmaqpen shala týǵan nárestelerge ota jasaý oıda erekshe saqtalyp qalady. Bul týraly elordada ótken patrıottar forýmynda marapattalǵan dáriger aıtty, dep habarlaıdy QazAqparat tilshisi.
«Bizdiń oblys jańa týǵan sábılerdiń ómir súrý deńgeıi boıynsha Qazaqstanda kóshbasshy bolyp tur. Qazaqstan boıynsha sábılerdiń ómir súrý deńgeıi - 66% bolsa, bul kórsetkish Pavlodar oblysynda - 95-97%. Bul – dárigerlerdiń bilikti, bilimdi, tájirıbeli mamandar ekenin bildiredi», - deıdi balalar dárigeri, Pavlodar oblystyq balalar aýrýhanasynyń hırýrgııa bóliminiń meńgerýshisi Erlan Ramazanov.
Hırýrg ómirinde jasaǵan eń kúrdeli ota týraly aıtty.
«Balalar hırýrgy bolyp eńbek etip júrgenime 16 jyl boldy. Biz mı men júrekten basqa jerdiń bárine ota jasaımyz. Meniń praktıkamda eń uzaq jasalǵan ota 12 saǵatqa sozyldy. Men jańa týǵan nárestedan bastap 18 jasqa deıingi balalarǵa ota jasaımyn. Otanyń ońaıy joq, biraq 600-700 gramm salmaqpen shala týǵan nárestelerge ota jasaý meniń oıymda erekshe saqtalyp qalady. Meniń eń kishkentaı patsıentim – 500 gramdyq sábı. Jańa týǵan náresteniń ishegine ota jasap, qýanyshqa oraı operatsııa sátti ótti», - deıdi ol.
Eske sala ketsek, saltanatty is-sharaǵa Qazaqstannyń barlyq óńirinen 200 delegat qatysty. Onyń ishinde óz kásibiniń úzdik ókilderi, el úshin qaltqysyz qyzmet etip, kúndelikti eńbegimen jáne úlgili isimen jurt nazaryna ilingen azamattar «Jyl patrıoty» nomınatsııasymen marapattaldy.
