«Balalar Evrovıdenıesi» baıqaýyna respýblıkalyq irikteý fınaly bastaldy
ASTANA. QazAqparat - «Habar» telearnasynyń tikeleı efırinde «Balalar Evrovıdenıesi» baıqaýyna respýblıkalyq irikteýdiń fınaly bastaldy. Shara Almaty qalasyndaǵy «Halyk Arena» stadıonynda ótip jatyr, dep habarlaıdy QazAqparat tilshisi.
Fınalda óńirlik irikteýlerden ótken 10 qatysýshy, atap aıtqanda Maksım Erjan, Zere Ámirbekova, Meıirjan Jıdebaı, Marııa Zatvarnıtskaıa, Janelıa Qaldybek, Dınar Nádirbekova, Asýat Sanat, Bınýra Saýdabaı, Danelııa Tólesheova, Súıkim Qabylbek alǵash ret myńdaǵan kórermenniń aldynda án salady.
Jeńimpazdy tańdaý úshin kórermender ózderine unaǵan qatysýshyǵa sms joldaý nemese telefonmen habarlasý arqyly daýys bere alady. Ónerpaz balalardyń ónerin ádilqazylar alqasy da baǵalaıdy. Degenmen, jeńimpaz kórermender men ádilqazylardyń ortaq sheshimi negizinde anyqtalatyn bolady.
Al ádilqazylar quramynda tanymal kásibı ánshiler men prodıýserler Roza Rymbaeva, Meırambek Bespaev, Tamara Asar, Baǵym Muhıtdenova, Erke Esmahan, Qaırat Nurtas, Renat Ǵaısın, Láılá Sultanqyzy, Mádına Sádýaqasova jáne Dımash Qudaıbergen bar. Keshti Maııa Bekbaeva, Nursultan Qurman, Marat Oralǵazın jáne Erkebulan Myrzabek júrgizedi.
Qazirgi ýaqytta «Balalar Evrovıdenıesi» baıqaýyna respýblıkalyq irikteý fınalynyń gala kontserti ótip jatyr. Ol saǵat 20.00-ge deıin jalǵasady. Odan keıin 30 mınýt daýys berý sharasy ótedi. Al saǵat 20.55-te tikeleı efırde jeńimpazdyń esimi jarııa etiledi.
Aıta keteıik, «Junior Eurovision Song Contest» halyqaralyq án baıqaýy alǵash ret 2003 jyly Kopengagende (Danııa) 16 eldiń qatysýshysy arasynda ótti. Telekórermender men qazylar alqasynyń jeńimpazdy birlesip anyqtaýy 2008 jyldan bastap engizildi. Oǵan deıin kórermender tikeleı kórsetilim kezinde daýys beretin.
Ár jyldary bul baıqaýdy Belgııa, Rýmynııa, Nıderlandy, Kıpr, Ýkraına jáne t.b. elder uıymdastyrdy. Al Reseı, Grýzııa, Belarýs jáne Malta eki ret jeńiske jetti. 2017 jylǵy Tbılısıde ótken baıqaýda «Wings» ánimen reseılik 14 jastaǵy Polına Bogýsevıch jeńimpaz atandy.
Bıyl baıqaýǵa 19 el qatysady. Olardyń qatarynda Albanııa, Armenııa, Avstralııa, Ázerbaıjan, Belarýs, Frantsııa, Makedonııa, Grýzııa, Irlandııa, Izraıl, Italııa, Qazaqstan, Malta, Polsha, Portýgalııa, Reseı, Serbııa, Nıderlandy, Ýels bar. Qazaqstan men Ýels bul baıqaýǵa alǵash ret qatysady.
