Balalar este saqtap úlgermeıdi: Depýtattar jıi aýysatyn mektep ınspektorlary jóninde
NUR-SULTAN. QazAqparat – Parlament Májilisiniń jalpy otyrysynda depýtat Irına Ýnjakova elimizdegi mektepterdi ınspektorlarmen qajetti deńgeıde qamtamasyz etýdi surady. Osy oraıda Úkimet basshysy Asqar Mamınniń atyna Májilistegi «Nur Otan» fraktsııasy atynan depýtattyq saýal joldady, dep habarlaıdy QazAqparat tilshisi.
Depýtat Tarazdaǵy mektepterdiń birinde oqýshy qyzǵa qatysty jasalǵan zorlyq-zombylyqqa toqtala kele, balalardyń mektep mekemelerinde tıisti deńgeıdi qorǵalmaǵany problema ekenin atap ótti.
Sonymen qatar I. Ýnjakova búginde elimizdegi kóptegen mektepterde ájethanalar aýlada ornalasqanyn jetkizdi.
«Tarazdaǵy tragedııa mekteptegi vıdeobaqylaý júıesiniń tıimsizdigin kórsetti. Resmı jańalyqtarda atalǵan er adam monıtorlarda bir saǵat boıy kórinip turǵany habarlandy. Alaıda oǵan eshkim nazar aýdarmaǵan. Jalpy, bilim berý uıymdarynda balalardyń ómiri men qaýipsizdigine mektep mekemesinde jumys isteıtin barlyq adam jaýapty, onyń ishinde mektep ınspektorlary da bar», - dedi ol.
Osy oraıda ol kóp jaǵdaıda ınspektorlar mektepte bolmaıtynyn, olar kóbine keńester nemese basqa da sharalarda júretinin jetkizdi.
Mektep ınspektorlary óz qyzmetinde uzaq turaqtamaıtynyn aıtqan I. Ýnjakova: «Olardyń jıi aýysýy saldarynan balalar da, muǵalimder de mektep ınspektorynyń túrin este saqtap úlgermeıdi. Іshki ister mınıstrligi málimetinshe, qazirgi kezde mektep ınspektorlarymen jasaqtalmaý deńgeıi 2000 birlikti qurap otyr», - dedi.
Osy oraıda depýtat atalǵan problemalardy eskere otyryp, keshendi ári júıeli sharalardy qabyldaýdy usyndy.
Bul rette, barlyq mektepti ǵımarat ishindegi ájethanamen qamtamasyz etý, beıne baqylaý júıesin ıntegratsııalaý jumystaryn jedeldetý máselesi kóterildi. Sonymen qatar, mektep ınspektorlarymen tolyqtaı qamtamasyz etý, beıtanys adamdardyń bilim berý mekemesiniń aýmaǵyna kirýin shekteý boıynsha qatań tártipti engizý usynysy aıtyldy.
Buǵan deıin Tarazdaǵy №6 mekteptiń 7-synyp oqýshysy bilim ordasynyń ájethanasynda zorlanǵany, kúdiktiniń qolǵa túskeni, oǵan jaýapty basshylardyń jumystan qýylǵany habarlanǵan bolatyn.
Oqıǵadan keıin Jambyl oblysynyń barlyq mektepterinde qaýipsizdik kúsheıtildi.
