Balalar densaýlyǵyn saqtaýǵa bólingen qarajat ulǵaıtyldy

NUR-SULTAN. QazAqparat – Bıyl balalar densaýlyǵyn saqtaýǵa bólingen qarajat kólemi ulǵaıtyldy. Bul týraly búgin Úkimet otyrysynda QR Densaýlyq saqtaý mınıstri Ajar Ǵınııat aıtty, dep habarlaıdy QazAqparat tilshisi.

«Balalar jyly aıasynda Densaýlyq saqtaý mınıstrligi balalar densaýlyǵyn saqtaýdyń birneshe baǵyty boıynsha qarjylandyrýdy ulǵaıtty. Atap aıtqanda, balalardy profılaktıkalyq tekserýge baǵyttalǵan qarjylandyrý kólemi 54 paıyzǵa 10,9 mlrd teńgeden 16,8 mlrd teńgege deıin artty. Mektep medıtsınasyna baǵyttalǵan qarjylandyrýdyń jalpy kólemi 22,2 mlrd teńgeden 27,5 mlrd teńgege deıin ulǵaıdy. Balalarǵa stomatologııalyq kómek kórsetý úshin 28,1 mlrd teńge bólindi. Bul 2021 jylmen salystyrǵanda 24,5 paıyzǵa joǵary», - dedi mınıstr.

Onyń dereginshe, alǵash ret qosymsha aýdıologııalyq skrınıngke 5,0 mlrd teńgeden astam qarajat bólindi.

«Mınıstrlik az qamtylǵan otbasylardyń balalaryna ortodontııalyq kómek kórsetý baǵdarlamasyn iske asyrýda. 2022 jyly osy maqsatqa bólingen soma 5,6 esege ulǵaıyp, 5,0 mlrd teńgeni qurady. Mindetti áleýmettik medıtsınalyq saqtandyrý júıesi engizilgennen beri medıtsınalyq ońaltýdy qarjylandyrý jalpy 7 esege artty. Onyń ishinde balalarǵa 2021 jyly 11,4 mlrd teńgeden astam qarajat, 2022 jyly 15,2 mlrd teńge bólindi», - dedi Ajar Ǵınııat.

Mınıstrdiń atap ótýinshe, qabyldanyp jatqan sharalar: júkti áıelderdi bosanýǵa deıingi sapaly baqylaýmen qamtýdy 80 paıyzǵa deıin ulǵaıtýǵa; ómiriniń birinshi jylyndaǵy balalardy proaktıvti baqylaýmen qamtýdy 75 paıyzǵa deıin arttyrýǵa; aýyr asqynýlardyń damýyn jáne qolaısyz nátıjelerdi 10 paıyzǵa deıin aldyn alýǵa; medıtsınalyq ońaltýdyń qoljetimdiligin, onyń ishinde alǵash ret erte shaqtaǵy balalar úshin 50 paıyzǵa deıin arttyrýǵa; «Ańsaǵan sábı» baǵdarlamasynyń arqasynda jylyna kópten kútken 2,5 myńǵa jýyq balanyń dúnıege kelýine yqpal etedi.