Balalar densaýlyǵyn qarjylandyrý bes jylda eki eseden astam ósti
ASTANA. KAZINFORM – Qazaqstanda balalar densaýlyǵyn qorǵaý jáne medıtsınalyq kómektiń sapasyn arttyrý baǵytyndaǵy jumystar kúsheıtilip keledi. Sońǵy bes jylda bul salany qarjylandyrý kólemi 264 mlrd teńgeden 585 mlrd teńgege deıin ósken.
Bul týraly Úkimettiń balalardy qoldaý jónindegi memlekettik saıasattyń iske asyrylý barysy týraly málimetinde aıtyldy.
– Qazirgi tańda balalarǵa medıtsınalyq kómek Tegin medıtsınalyq kómektiń kepildik berilgen kólemi jáne Mindetti áleýmettik medıtsınalyq saqtandyrý júıesi aıasynda tegin kórsetiledi, – delingen habarlamada.
Úkimet qabyldaǵan sharalardyń nátıjesinde bala dúnıege kelmeı turyp patologııalardy anyqtaý men aldyn alýǵa erekshe nazar aýdarylyp otyr.
Fetaldy hırýrgııany, ıaǵnı qursaqtaǵy balaǵa jasalatyn operatsııalardy engizý jáne 4 myńǵa jýyq meıirger jumys isteıtin patronaj júıesin damytý oń nátıjeler bergen.
– Bul sharalar táýelsizdiktiń alǵashqy jyldarymen salystyrǵanda náreste ólimin 7,5 esege, al ana ólimin 6 esege tómendetýge múmkindik berdi, – dep atap ótildi.
Týǵannan keıin balalar neonataldy, aýdıologııalyq jáne oftalmologııalyq skrınıngterden ótedi. Sonymen qatar olardyń damý kórsetkishteri turaqty baqylaýda bolady.
Elimizdiń óńirlerinde balalar aýrýhanalary jańartylyp, jańa perınataldyq ortalyqtar salynyp jatyr.
Mamandandyrylǵan jáne joǵary tehnologııalyq medıtsınalyq kómektiń kólemi de keńeıtilýde.
– Onyń ishinde balalar onkogematologııasy salasyndaǵy qyzmetterdiń qoljetimdiligi artyp keledi, – delingen málimette.
Jasóspirimderdiń densaýlyǵyn saqtaý máselesine de erekshe kóńil bólinýde. Qazir árbir mektep alǵashqy medıtsınalyq-sanıtarlyq kómek uıymdaryna bekitilgen.
Bilim berý uıymdarynda aýrýlardyń aldyn alý, dene damýyn baqylaý jáne salaýatty ómir saltyn nasıhattaý jumystaryn júrgizetin medıtsınalyq pýnktter jumys isteıdi.
2025 jyldan bastap mektepterde oqýshylardyń jas erekshelikterin eskeretin jańa tamaqtaný standarty engizildi.
Psıhıkalyq densaýlyqty qoldaý júıesi de damyp keledi.
– Balalar men ata-analar jastar densaýlyǵy ortalyqtaryna jáne psıhıkalyq densaýlyq ortalyqtaryna júginip, keńes pen kómek ala alady, – delingen habarlamada.
Balalardyń qaýipsizdigin qamtamasyz etý maqsatynda táýlik boıy jumys isteıtin «112» biryńǵaı nómiri qyzmet kórsetedi.
Sonymen qatar jasóspirimderdiń densaýlyǵyna zııandy áserdi azaıtý úshin elektrondy temeki men veıpterdiń aınalymy zańmen shektelip, 21 jasqa tolmaǵan azamattarǵa energetıkalyq sýsyndar satýǵa tyıym salyndy.
Aıta keteıik, Almatyda balalar merekesine oraı tegin medıtsınalyq tekserýler men aktsııalar ótip jatyr.
