Balalar densaýlyǵy: Qazaqstan DDU-men birge jańa medıtsınalyq qural ázirledi
ASTANA. KAZINFORM — Qazaqstanda 1000 betten astam kólemde balalar men jasóspirimderge medıtsınalyq-sanıtarııalyq alǵashqy kómek (MSAK) kórsetý boıynsha DDU-nyń jańa qalta anyqtamalyǵy shyǵaryldy. Bul týraly DSM baspasóz qyzmeti habarlady.
Qazirgi ýaqytta kitaptyń redaktsııasy júrgizilýde, anyqtamalyqty tsıfrlandyrý jáne memlekettik tilge aýdarý josparlanyp otyr.
— Qujat dárigerlerge, meıirgerlerge jáne densaýlyq saqtaýdyń bastapqy mekemelerinde kómek kórsetetin basqa da densaýlyq saqtaý qyzmetkerlerine arnalǵan eń ózekti qural bolyp tabylady. Onda dárigerler, meıirgerler jáne balalar men jasóspirimderge MSAK deńgeıinde kómek kórsetetin basqa mamandarǵa arnalǵan DDU-nyń sońǵy klınıkalyq usynystary bar.
Nusqaýlyq eń kóp taralǵan shaǵymdar men jaǵdaılary bar balalar men jasóspirimderdi qalaı basqarýǵa jáne qaıda baǵyttaýǵa bolatynyn sıpattaıdy. Anyqtamalyqta uzaq merzimdi buzylýlary men aýrýlary bar balalar men jasóspirimderge kómekti úılestirý úshin MSAK mamandaryna arnalǵan aqparat berilgen, — delingen habarlamada.
Sondaı-aq týǵannan bastap eresek jasqa deıingi densaýlyqtyń aldyn alý jáne nyǵaıtý sharalary, sonyń ishinde deni saý balaǵa barý kezeńderi boıynsha keńester, erte shaqtaǵy damýdy baqylaý jáne jasóspirimderge olardyń densaýlyǵyna qatysty keńester beriledi.
Densaýlyq saqtaý mınıstrliginiń basshylyǵymen DDU-nyń eldik ofısiniń qoldaýymen 30 mamannan turatyn mýltıdıstsıplınalyq jumys toby quryldy, onyń ishinde ulttyq jáne óńirlik ÁPPM/BShAYQ úılestirýshileri, beıindi ulttyq ortalyqtar, Ulttyq medıtsınalyq ýnıversıtetterdiń balalar aýrýlary jáne neonatologııa kafedralary jáne beıindi mamandar (psıhıatrlar, balalar akýsher-gınekologtary, travmotologtar, LOR mamandary jáne t. b).
Pikirler men usynystar DDU-nyń medıtsınalyq kómektiń sapasy jónindegi Eýropalyq ofısimen (Afına, Gretsııa) DDU-nyń taǵaıyndalǵan táýelsiz sarapshysymen úzdiksiz keńesý arqyly jumys keńesteri aıasynda talqylandy.
Qarqyndy jumys nátıjesinde balalar men jasóspirimderge arnalǵan MSAK boıynsha qaltaly anyqtamalyqtyń Qazaqstandyq nusqasy ázirlendi.
Jumys Danııanyń LEGO Qorynyń qarjylyq qoldaýymen «Densaýlyq saqtaý jáne onymen baılanysty sektorlar arqyly ata-analarǵa qoldaý kórsetý úshin ǵylymı negizdelgen aralasýdy keńeıtýdi qoldaý» jobasy sheńberinde júrgizilip jatyr.
Aıta ketelik Innovatsııalar men skrınıng: Qazaqstan densaýlyq saqtaý salasyn jańa deńgeıge shyǵardy.