«Balalar dalada tońyp tur»: Semeı ákimdigi jelide taraǵan fotoǵa jaýap berdi

SEMEI. QazAqparat – Semeıde áleýmettik jelide oqýshylardyń sýyq aýa raıynda mektepke kire almaı turǵany týraly aqparat tarady. Osyǵan oraı qala ákimdigi resmı jaýap berdi, dep habarlaıdy QazAqparat tilshisi.

Búgin WhatsApp messendjerinde jáne áleýmettik jelide oqýshylardyń sýyq aýa raıynda mektepke kire almaı turǵany týraly aqparat tarady.

Belgili bolǵandaı, sýret Bobrovka kentindegi №44 jalpy orta mektepte túsirilgen.

Alaıda qala ákimdigi bul aqparattyń shyndyqqa sáıkes kelmeıtindigin, balalardyń mektepke esh kedergisiz kirgenin málim etti.

«Bobrovka kentindegi bilim ordasynyń ishki tártip erejesine saı oqýshylar mektepke 07.00-den bastap keledi. 24 qarasha kúni mekteptiń ortalyq esigi ashyq turdy. Kelgen oqýshylar sol esikten kirip jatty. Al bastaýysh synyp oqýshylary mektepke kúndelikti mekteptiń qosalqy esigi arqyly kiretin. Búgin kúnniń sýyqtyǵyna baılanysty, tańerteńgi saǵat 07:20-da qosalqy esik jabyldy. Oqýshylar mektepke ortalyq esikten kirgizildi», - delingen aqparatta.