Balalar arasyndaǵy sýıtsıdtiń sebebi 40 paıyzynda ǵana anyqtalady - mınıstr
NUR-SULTAN. QazAqparat – Balalar arasyndaǵy sýıtsıdtiń sebebi 40 paıyzynda ǵana anyqtalady. Bul týraly Senattaǵy Úkimet saǵatynda Іshki ister mınıstri Erlan Turǵymbaev málim etti, dep habarlaıdy QazAqparat tilshisi.
Mınıstrdiń aıtýynsha, balalardy qorǵaý turǵysynda jeke baǵdarlama ázirlenýi kerek.
«Balalardyń qaraýsyz qalýy jetkinshekterdiń páter terezesinen qulap ketýine alyp keledi. Byltyr osy baǵytta aldyn alý is-sharalaryn uıymdastyrǵan bolatynbyz. Jaz kezinde turǵyndar terezege masa toryn (moskıt) ornatady. Balalar bul tordyń salmaq kóterýge arnalmaǵanyn túsinbeıdi. Búldirshinderdiń osy torǵa súıenip turýy qaıǵyly oqıǵamen aıaqtalyp jatady. Bul turǵyda bizge balalarǵa qatysty qaıǵyly jaǵdaılarǵa tosqaýy qoıý maqsatynda jeke baǵdarlama kerek dep oılaımyz», - dedi mınıstr.
Onyń sózine qaraǵanda, balalar arasyndaǵy ózine-ózi qol jumsaý baǵytynda basqa statıstıka qalyptasyp otyr.
«Tek 40 paıyzynda balalar sýıtsıdi sebebin bilip jatamyz. Bul turǵyda ata-analarymen, mekteptegi, sondaı-aq turǵyn úı aýlasyndaǵy qarym-qatynas máseleleri bar. Qalǵan 60 paıyz jaǵdaıynda biz bilmeı jatamyz, sebebi tıisti málimetter bolmaıdy», - dedi mınıstr.
Budan buryn habarlanǵandaı, E. Turǵymbaev turmystyq zorlyq-zombylyq baǵatyndaǵy qylmystardyń 80 paıyzy azamattardyń jeke úılerinde oryn alatynyn aıtty.
