Balalar arasyndaǵy alǵashqy paralımpıadalyq oıyndardyń jeńimpazdary belgili boldy
ASTANA. QazAqparat - Astanada balalar arasyndaǵy alǵashqy paralımpıadalyq oıyndar aıaqtaldy dep habarlaıdy elorda ákimdiginiń medıa ortalyǵy.
QR Tuńǵysh Prezıdenti qory uıytqy bolǵan paralımpıadalyq oıyndardy ótkizýdiń basty maqsaty adaptıvti dene tárbıesin tanymal etý jáne damytý, ınklıýzıvti bilim berý salasyndaǵy jańa kommýnıkatsııalyq sheshimderdi damytý, erekshe qajettilikteri bar daryndy balalardy anyqtaý jáne árbir qatysýshy balanyń damýyna yqpal etý bolyp tabylady.
Qanatqaqty joba aıasyndaǵy paralımpıada oıyndaryna elimizdiń Aqmola, Almaty, Qostanaı, Pavlodar oblystary men Astana qalasynan 120 sportshy qatysty. 12-den18 jastaǵy órender sporttyń 5 túri boıynsha baqtaryn synaǵan bolatyn. Bul: voleıbol, shahmat, qońyraýmen júgirý, júzý jáne arbada tańylǵandar arasynda júrgiziletin bı saıystary.
Osylaısha júzý jarysynda úshinshi orynǵa Ernur Jolashar (Astana qalasy), ekinshi orynǵa Ádilet Júrgenov (Aqtóbe oblysy) ıe boldy. Al birinshi oryn Vladıslav Nınahanovqa (Qostanaı oblysy) buıyrdy.
Shahmattan qola júldeni Nabı Dıas (Almaty oblysy), kúmis júldeni Araılym Saǵıeva (Aqtóbe oblysy) qanaǵat tutsa, altyn júldeni Sultan Qojahmetov enshiledi.
Arbadaǵy bı saıysynda úshinshi oryndy Lestın Aslambekov pen Dıana Musaǵulova, ekinshi oryndy Tańathanov Baǵdat pen Jansulý Kúzenbaeva (Qostanaı oblysy) aldy. Al Erlan Nurmaǵanbetov pen Sandýǵash Aqanova atalmysh saıysta top jardy.
Qońyraýmen júgirý jarysynda Nadejda Kohanenko (Qostanaı oblysy) men Aııa Hamzına (Almaty oblysy) úshinshi oryndy ózara bólisse, ekinshi oryndy Dılıara Asaınova (Pavlodar oblysy) ıelengen bolatyn. Al Valerııa Gavrılına (Astana qalasy) máre syzyǵyna bárinen buryn jetip, altyn medaldy qanjyǵasyna baılady.
Al voleıboldan komandalyq esepte úshinshi oryn Astana qalasynyń komandasyna, ekinshi oryn Aqtóbe oblysynyń komandasyna buıyrdy. Al jeńis tuǵyrynan atalmysh jarysta Pavlodar oblysynyń komandasy kórindi.
Aıta ketý kerek, atalmysh sport túrlerinen paralımpıadalyq oıyndar kelesi jyldan bastap dástúrli túrde respýblıka deńgeıinde ótkiziledi dep joparlanýda.
