Balalar arasynda tumaý jaǵdaılary 28 paıyzǵa az tirkeldi

NUR-SULTAN. QazAqparat – QR Densaýlyq saqtaý vıtse-mınıstri Ajar Ǵınııat bıyl balalar arasynda aýrýǵa shaldyǵý deńgeıi tómendeginen aıtty, dep habarlaıdy QazAqparat tilshisi.

«Jalpy, negizgi statıstıkalyq derekterde elimiz boıynsha bala týý artty, balalardyń aýrýshańdyǵy men ólim-jitiminiń deńgeıi tómendedi, oń ózgerister baıqalady. Atap aıtqanda, 2020 jyldyń 9 aıynda 320 302 bala dúnıege keldi, 2019 jyldyń uqsas kezeńine qaraǵanda bul kórsetkish 5 paıyzǵa joǵary», - dedi vıtse-mınıstr Ortalyq kommýnıkatsııalar qyzmetinde.

Onyń aıtýynsha, bıylǵy jyldyń 9 aıynyń qorytyndysy boıynsha 18 jasqa deıingi balalardyń jalpy syrqattanýshylyq kórsetkishi 15 paıyzǵa tómendedi.

«Byltyrmen salystyrǵanda balalardyń arasynda tumaý jaǵdaılary 28 paıyzǵa az tirkeldi. 2020 jyldyń 9 aıynda pnevmonııamen jalpy syrqattanýshylyq kórsetkishi 2019 jyldyń sáıkes kezeńimen salystyrǵanda 3,5 paıyzǵa tómendedi. Sonymen qatar, náreste óliminiń kórsetkishi 2,5 paıyzǵa, balalar óliminiń kórsetkishi 8 paıyzǵa azaıdy», - dedi A. Ǵınııat.

Budan buryn habarlanǵandaı, bıyl elimizde COVID-19 dıagnozy rastalǵan barlyǵy 3 164 bala tirkelgen, onyń ishinde 114 jańa týǵan náreste bar. Qazirgi kezde COVID-19 indeti bar 340 bala baqylaýda tur.