Balalar arasynda sporttyq týrızmdi damytýdyń qarqyny jaqsy - QR BǴM
ASTANA. QazAqparat - 700 myńǵa jýyq joǵary synyp oqýshylary jazǵy eńbekke baýlý brıgadalaryna tartyldy. Bul týraly búgin Ortalyq kommýnıkatsııalar qyzmetindegi brıfıngte QR Bilim jáne ǵylym vıtse-mınıstri Esenǵazy Imanǵalıev málim etti.
«Bıylǵy jazda 1 mln. 106 myń 453 bala túrli salalarǵa baýlý, demalys sharalarymen qamtyldy. Onyń ishinde 693 myń oqýshy 2 241 eńbek otrıadynda, 306 eńbek jáne demalys lagerlerinde, 11 447 kógaldandyrý brıgadalarynda, 564 mektep janyndaǵy ormanshylyqtarda, sondaı-aq 4 884 jóndeý-qurylys brıgadalarynda boldy»,-dedi mınıstrdiń orynbasary.
Budan bólek vıtse-mınıstr balalardy shyǵarmashylyq turǵyda shyńdaýǵa 10 343 klýb pen 807 aýla klýbtary atsalysyp jatqandyǵyn, sonymen qatar sońǵy kezde sporttyq-týrıstik baýlý jaqsy qarqyn alyp kele jatqandyǵyn jáne osy baǵytta 241 852 bala qamtylǵanyn atap ótti.
«Jaz kezinde 2 303 saparlar men ekskýrsııalar, respýblıka boıynsha 1 912 týrıstik saparlar men 443 sporttyq jıyndar uıymdastyryldy. 78 myńnan astam bala jazǵy olımpıadalyq rezervtiń 224 mektebine, «Jas Ulan» lıderleriniń 848 jazǵy mektepterine, 449 jazǵy tildik lagerler men 222 pikirsaıys lagerlerine tartyldy. Jalpy jazǵy saýyqtyrý sharalaryna jergilikti atqarýshy organdar tarapynan 3 mlrd. teńgeden astam qarjy bólindi», - dedi E. Imanǵalıev.
