Balalar arasynda ótetin «Aıbyn» jıynyna bıyldan bastap toǵyzqumalaq engizildi

NUR-SULTAN. QazAqparat – «Jas sarbaz» jasóspirimder áskerı-patrıotyq qozǵalysy respýblıkalyq qoǵamdyq birlestiginiń tóraǵasy Meıirbek Mendiǵalıev bıyl «Aıbyn» onlaın áskerı-patrıottyq jıynynda qandaı baıqaýlar ótetinin aıtty, habarlaıdy QazAqparat tilshisi.

Onyń aıtýynsha, sońǵy 6 jyldan beri ótkizilip kele jatqan dástúrli baıqaýlar men saıystardyń bári ózgerissiz qalǵan.

«Aıbyn daryny» zııatkerlik oıyny jalpy bilim beretin pánder men ártúrli saladaǵy aýdıo, vıdeo suraqtardan turady. Ár komanda 1 qatysýshydan qatystyrady. «Meıirim biriktiredi» saıysynda ár komanda áleýmettik jelide chellendjdi iske qosady. Eń kóp «laık» jınaǵan komanda jeńiske jetedi. «Aıbyn juldyzy» shyǵarmashylyq baıqaýynda Táýelsizdiktiń 30 jyldyq mereıtoıyna arnalǵan shyǵarmashylyq beınebaıan daıyndaý qajet. Robot tehnıkasy boıynsha «SMART SARBAZ» konkýrsy aıasynda ár komanda bir jobany usynýǵa tıis. Ol úshin 5 mınýtqa deıin ýaqyt beriledi. Mobıldi qosymshanyń kamerasyna túsý arqyly óz jobalaryn tóreshiler aldynda qorǵaıdy», - dedi birlestik tóraǵasy oratlyq kommýnıkatsııalar qyzmetinde ótken brıfıngide.

Sondaı-aq, ol sporttyq jáne áskerı daıyndyq boıynsha normatıv tapsyrý bıyl da bolatynyn eskertti.

«Normatıvterge kermede tartylý, shalqalap jatyp deneni kóterý, AK-74 ishinara bólshekteý men jınaqtaý kiredi. «Salamatty jas sarbaz» konkýrsynda komandalardyń alǵashqy medıtsınalyq kómek kórsetý qabiletteri tekseriledi. Bul konkýrs jastardyń arasynda medıtsınalyq volonterlikke baýlý úshin de nazarǵa alyndy. Rýhanı qundylyqtardyń ózektiligin arttyrý úshin «Toǵyzqumalaq» ulttyq oıyny jıyn sheńberinde alǵashqy ret ótkiziletin bolady. Jastardyń oılaný qabiletin damytýǵa yqpal etetin jańa baıqaý qatysýshylar arasynda úlken suranysqa ıe bolatynyna senimdimiz», - dedi Meıirbek Mendiǵalıev.