Balalar arasynda qaı aýrý kóp taraǵan
«Balalar arasynda eń kóp taralǵan aýrýlardyń biri - tis aýrýy, aýyz qýysy men jaq-bet aýrýlary. Statıstıkalyq derekterge sáıkes, respýblıkamyzda balalar arasynda tis jegisiniń taralýy 76% qurady, al birqatar aýyldyq aýmaqtarda bul kórsetkish 98% jetedi. Dese de, Dúnıejúzilik densaýlyq saqtaý uıymynyń usynymdary boıynsha 2020 jylǵa tis jegisimen zaqymdalǵan balalardyń sany 20% aspaýy qajet», - dedi D. Myńbaı Parlament Májilisiniń jalpy otyrysynda.
Osy oraıda, ol josparly stomatologııalyq kómek aqysyz medıtsınalyq kómektiń kepildik berilgen kólemi sheńberinde júrgizilip jatqanyn eske saldy. Bul turǵyda 18 jasqa deıingi balalar qamtylǵan. Jyl saıyn memlekettik jáne jekemenshik aýrýhanalarǵa qarajat bólinedi, alaıda jyldan jylǵa statıstıka jaqsarmaı keledi.
«Stomatologııalyq qyzmetke Stomatologtardyń biryńǵaı qazaqstandyq assotsıatsııasy júrgizgen taldaý onyń kemshin tustaryn aıǵaqtady, onyń eń óreskelin aıtar bolsaq, búginde balalardyń tis jáne aýyz qýysynyń jáı-kúıine dınamıkalyq baqylaý joq. Taǵy bir mańyzdy másele - memlekettik stomatologııalyq balalar emhanalarynyń jekeshelendirilýi. Elimizde 2 812 stomatologııalyq uıym bar, olardyń 1 121 memlekettik menshik nysanynda, sonyń ishinde 12 memlekettik mamandandyrylǵan oblystyq balalar emhanasy ǵana bar», - dedi depýtat.
Onyń sózinshe, balalar stomatologııasynan aıyrylsaq - kezinde pedıatrııany qysqartyp tastaǵandyǵydaı jaǵdaıǵa dýshar bolamyz.
«Balalar stomatologııasynyń birqatar erekshelikteri bar, oǵan mamandaný qajet nemese eresekterdi emdeıtin kez kelgen dáriger balalardy emdeı almaıdy. Burynǵy kezde balalardy balabaqshalarda, jasóspirimderdi mektepterde, stýdent jastardy kolledjder men ınstıtýttarda turaqty túrde baqylaıtyn. Qazir stomatologııalyq kabınetter tek oqýshylar sany 800-den asatyn mektepterde ǵana bar. Bul elimizdegi barlyq mektep oqýshylarynyń úshten bir bóligin ǵana qamtıdy. Onyń ústine, qazir mektepterde jumys istep turǵan stomatologııalyq kabınetterdiń ózderin qural-jabdyqtarmen qamtamasyz etý problemalary bar, mamandar men dárigerler jetispeıdi. Mysaly, keıbir derekterge sensek, Astanadaǵy tek 6 mektepte ǵana stomatologııalyq kabınetter tolyq kólemde jumys istep jatyr. Al sonda basqalaryn, olardyń ishinde alys aýdandardaǵy, aýyldardaǵy mektepter men mektepaldy mekemelerdi qaıtpekpiz?»,- dedi ol.
Osy oraıda Darhan Myńbaı joǵaryda baıandalǵanǵa baılanysty tıisti usynystardy qarastyrýdy surady. Osy oraıda mektepterdi, mektepaldy mekemelerdi stomatologııalyq tolyqqandy qyzmetpen tegis qamtamasyz etý úshin zamanaýı jyljymaly stomatologııalyq kabınetterdi endirý jóninde baǵdarlama ázirleý usynysy jasaldy. Sonymen qatar stomatologtyń balalar men jasóspirimderdi baqylaýynyń dıspanserlik ádisin qalpyna keltirý qajettigi aıtyldy.