Balalar arasynda qant dıabetine shaldyqqandar kóbeıip keledi — DSM
ASTANA. KAZINFORM — Qazaqstanda sońǵy jyldary balalar arasynda qant dıabeti boıynsha alǵashqy syrqattanýshylyq kórsetkishi ósip keledi. Bul týraly QR Densaýlyq saqtaý mınıstrligi Kazinform agenttiginiń resmı saýalyna bergen jaýabynda málim boldy.
Mınıstrliktiń málimetinshe, 2021–2025 jyldar aralyǵynda elimizde qant dıabetimen jalpy syrqattanýshylyq 21,4 paıyzǵa ósip, 100 myń turǵynǵa shaqqanda 273,1 jaǵdaıdan 331,6 jaǵdaıǵa deıin jetken.
Balalar arasyndaǵy kórsetkish te joǵarylaǵan. 0–14 jas aralyǵynda qant dıabeti alǵash anyqtalǵandar sany 100 myń balaǵa shaqqanda 2021 jylǵy 15,0 kórsetkishten 2025 jyly 22,9-ǵa deıin ósken.
15–17 jas aralyǵyndaǵy jasóspirimder arasynda 2025 jyldyń qorytyndysy boıynsha alǵashqy syrqattanýshylyq kórsetkishi 100 myń turǵynǵa shaqqanda 37,1 boldy. Bul 2024 jylǵy kórsetkishten (39,0) tómen bolǵanymen, 2021 jylǵy deńgeıden (24,8) joǵary.
Mınıstrlik málimetinshe, bul úrdis artyq salmaq pen semizdik, durys tamaqtanbaý, qımyl-qozǵalystyń azdyǵy jáne basqa da qaýip faktorlarymen baılanysty. Dúnıejúzilik densaýlyq saqtaý uıymynyń deregine sáıkes, artyq salmaq pen semizdik 2 tıpti qant dıabeti, joǵary qan qysymy, júrek-qan tamyrlary aýrýlary, maı almasýynyń buzylýy, qaterli isiktiń keıbir túrleri jáne tirek-qımyl júıesi aýrýlarynyń damý qaýpin arttyrady.
— Bul aýrýlardyń damýyna artyq salmaq pen semizdikpen qatar durys tamaqtanbaý, qımyl-qozǵalystyń jetkiliksizdigi, tuqym qýalaýshylyq jáne basqa da qaýip faktorlary áser etedi, — delingen mınıstrlik jaýabynda.
Eske salaıyq, buǵan deıin Densaýlyq saqtaý mınıstrligi qazaqstandyqtarǵa semizdik pen sozylmaly aýrýlardyń aldyn alý úshin qant tutynýdy shekteýge keńes bergen edi.
