Balalar ádebıetin damytý ulttyq strategııasy qabyldana ma – Bektenov jaýaby

ASTANA. KAZINFORM – Premer-mınıstr Oljas Bektenov Senat depýtattarynyń balalar ádebıetin damytýǵa arnalǵan ulttyq strategııa qabyldaý usynysyna jaýap berdi.

- Memleket tarapynan balalar ádebıetin damytý boıynsha júıeli túrde qoldaý sharalary júzege asyrylyp keledi. Atap aıtqanda balalarǵa arnalǵan kórkem jáne tanymdyq ádebıetterdiń qoljetimdiligin arttyrý, oqý saýattylyǵyn damytý, sondaı-aq kitaphanalyq qorlardy jańǵyrtý boıynsha jumystar atqarylyp jatyr. Memleket basshysynyń tapsyrmasyna sáıkes «Balalar kitaphanasy» baǵdarlamasy júzege asyrylýda. Baǵdarlama óskeleń urpaqtyń oqýǵa jáne bilim alýǵa degen qyzyǵýshylyǵyn damytýǵa baǵyttalǵan. Onyń aıasynda túrli tárbıelik jáne aǵartýshylyq is-sharalar (ádebı keshter, kitap jármeńkeleri, kitap keıipkerleriniń baıqaýlary, «Kitaptar aınalymy» aktsııasy jáne «Shyn júrekten kitap syıla!» chellendji) júzege asyrylady, - dedi Úkimet basshysy jaýabynda.

Onyń atap ótýinshe, barlyq bilim berý uıymyna «Adal azamat» biryńǵaı tárbıe baǵdarlamasy engizildi. Budan basqa 2024-2025 oqý jylynda («Qamqor», «Eńbegi adal jas óren», «Smart bala», «Shabyt», «Ushqyr oı alańy», «Balalar kitaphanasy» syndy 6 negizgi joba iske asyryldy.

- Bul rette balalar ádebıetin damytýǵa arnalǵan birtutas ulttyq strategııasyn qabyldaý qosymsha ınstıtýtsıonaldyq jáne qarjylyq resýrstardy qajet etedi. Osy baǵyttaǵy is-sharalar júrgizilip jatqan jumystar aıasynda jalǵastyrylady, - dedi ol.

Buǵan deıin elimizde balalar ádebıeti qalaı damyp kele jatqanyn jazǵan edik.