Balalar ádebıetin jandandyrý úshin salany salyqtan bosatý qajet - A. Smaıyl
ASTANA. 14 naýryz. QazAqparat - Búgin QR Parlamenti Májilisiniń jalpy otyrysynda depýtat Aldan Smaıyl Úkimet basshysynyń atyna saýal joldady.
Onda depýtat balalar ádebıetin shyǵarýda oryn alyp otyrǵan problemalardy kóterip, salany salyqtan bosatýdy surady.
«Ataqty halıf Harýn Rashıd jaýlap alǵan jerlerinde salyqty kitap túrinde jınaǵan. Tarıhshy ǵulama Leonardo Brýnı 1406 jyly «Istorııa» eńbeginiń alǵashqy kitabyn jarııalaǵanda grek-rım bıligi osy úshin salyqtan bosatqan. HHІ ǵasyrdaǵy táýelsiz Qazaqstan da osyndaı ǵıbratty qadamǵa barsaq, halyq «bárekeldi» der edi», - deıdi depýtat Aldan Smaıyl.
Osy negizderdi alǵa tarta kele, depýtat balalarǵa arnalǵan ádebıetti basyp shyǵarýǵa arnalǵan qyzmettiń barlyq túrlerin salyqtan bosatý týraly másele kóterdi. Depýtattyń deregine súıensek, 2011 jyly respýblıka boıynsha memlekettik tapsyryspen balalar kitaptary 287 atalymmen shyqqan. Bul byltyr shyqqan barlyq kitaptyń baspa tabaqpen eseptegendegi 7 paıyzyn ǵana quraıdy. Endeshe balalar baspasynyń taralymy jas jetkinshekterdiń jartysynyń jartysyna da jýymaıdy.
«Bul problemalar oılandyrýy tıis. Balalar kitaptaryn shyǵarý qyzmetine salyq salmaý nemese ony 5 paıyzǵa deıin azaıtý týraly sheshim qabyldansa ıgi. Sol arqyly balalar ádebıetiniń taqyrybyn keńeıtemiz, qalamgerdi yntalandyramyz, jetkinshekter kitaptarynyń taralymyn arttyramyz. Dál osyndaı jeńildik toqyraýdan turalap turǵan mýltfılmder túsirý qyzmetine de jasalsa ıgi», - deıdi Aldan Smaıyl.
Eske salsaq, Eýropanyń damyǵan jurtynda, onyń ishinde Reseı, Latvııa, Belgııada kitaptarǵa salynatyn qosymsha qun salyǵy 5 paıyzdan aspaıdy. Al Ulybrıtanııa, Irlandııa, Norvegııa, Polsha, Ýkraına elderinde kitapqa salyq múldem salynbaıdy. «Qazaqstanda da sondaı qadam úshin esh kedergi joq. Balalarǵa arnalǵan iltıpat qana kerek», - deıdi Aldan Smaıyl.
