«Balaqaılar mektebi»: Jazǵy mektepaldy daıyndyqqa 90 myń bala qatysty

ASTANA. KAZINFORM — Qazaqstanda 90 myńǵa jýyq bala «Balaqaılar mektebi» baǵdarlamasy boıynsha mektepaldy daıyndyqtan ótti, dep habarlaıdy Oqý-aǵartý mınıstrliginiń baspasóz qyzmeti.

Jazǵy demalys kezinde birinshi synypqa baratyn balalarǵa birdeı bastapqy múmkindik berý maqsatynda mektepaldy daıyndyqqa arnalǵan «Balaqaılar mektebi» qysqa merzimdi baǵdarlama uıymdastyryldy. 

Baǵdarlama mektepke deıingi bilim berý men bastaýysh mektep arasyndaǵy sabaqtastyqty qamtamasyz etedi, balalardy mektepke deıingi tárbıe men oqytýdyń úlgilik oqý baǵdarlamasynyń baǵyttary boıynsha mektepke aldyn ala daıyndaýǵa múmkindik beredi.

Atalǵan baǵdarlama memlekettik jalpyǵa mindetti mektepke deıingi tárbıe men bilim berý standartyna sáıkes ázirlendi.

— Jazǵy úsh aı ishinde bastaýysh synyp muǵalimderiniń qatysýymen 90 myńǵa jýyq mektepke deıingi jastaǵy bala qysqa merzimdi daıyndyqtan ótti. Onyń ishinde qalalarda shamamen 60 myń, aýyldyq jerlerde 30 myńnan astam bala qamtyldy. Oqytý barysynda balalardyń fızıkalyq, kommýnıkatıvtik, ıntellektýaldyq, shyǵarmashylyq jáne áleýmettik-emotsıonaldy daǵdylaryn damytýǵa, sondaı-aq mektepke oń kózqarasyn qalyptastyrýǵa basymdyq berildi, — deıdi Mektepke deıingi bilim berý departamentiniń dırektory Manar Adamova.

Aıta keteıik, mektepaldy daıyndyq baǵdarlamasy 1 aıǵa eseptelgen. Bilim berý protsesin bilikti bastaýysh synyp muǵalimderi nemese mektepaldy daıarlyq pedagogteri júrgizdi.

Osyǵan deıin jańa oqý jyly aldynda mektep mańyndaǵy qaýipsizdik qatań tekseriletini aıtyldy.