Balaǵa zábir kórsetken: Oralda balabaqshadaǵy oqıǵaǵa qatysty qylmystyq is qozǵaldy

ORAL. KAZINFORM — Oral qalasyndaǵy balabaqshada bolǵan keleńsiz oqıǵaǵa qatysty qylmystyq is qozǵaldy. 

BQO polıtsııa departamentiniń baspasóz qyzmetinen málim etkenindeı, qazirgi kezde oqıǵanyń barlyq mán-jaıy anyqtalyp jatyr. 

— Oral qalasyndaǵy balabaqshada balanyń zábir kórýine qatysty, QR QK 140-baby 2-bóligine (kámeletke tolmaǵan adamdy tárbıeleý jónindegi mindetterdi oryndamaý) sáıkes qylmystyq is qozǵaldy. Tergeý amaldary jalǵasyp jatyr, - dep habarlady vedomstvodan. 

Eske sala keteıik, budan buryn balanyń zábir kórýine baılanysty Oralda balabaqsha qyzmetkeri jumysynan bosatylǵanyn jazǵan edik.

Onda «Montekids» balabaqshasynda bolǵan oqıǵadan keıin ata-ana shaǵymy qaralyp, ákimger qyzmetinen shettetilip, tárbıeshiniń jumystan bosatylǵany habarlandy. Oral qalasy bilim berý bólimi tarapynan qyzmettik tekserý júrgizilip, barlyq beınejazba men materıal tıisti tergeý organdaryna joldandy.