Balaǵa rýhanı tárbıe berý isi kenjelep qaldy - balabaqsha meńgerýshisi
ASTANA. QazAqparat - Astanadaǵy №29 «Aq qaıyń» balabaqshasynda «Rýhanı jańǵyrý - tulǵany adamgershilikke tárbıeleý - zaman talaby» klasteri boıynsha semınar ótti, dep habarlaıdy QazAqparat tilshisi.
Onda adamgershilik-rýhanı, patrıottyq bilim berý baǵdarlamasyn biryńǵaı bilim berý keńistigine engizýdegi jumys tájirıbesi talqylandy.
«Astana qalasynyń 2017-2020 jyldarǵa arnalǵan bilim berýdi damytý baǵdarlamasyna sáıkes, qaladaǵy barlyq bilim berý mekemeleri túrli klasterlerge bólindi. Onyń ishinde mektepke deıingi mekemeler 4 klasterge bólingen. Sonyń biri - adamgershilik-patrıottyq tárbıe klasteri boıynsha elordanyń 5 balabaqshasy (№29, 9, 58, 6, 24) jumys isteýde», - dep atap ótti №29 «Aq qaıyń» balabaqshasynyń meńgerýshisi Láılá Raqymjanova.
Onyń aıtýynsha, óskeleń urpaqty adamgershilik-rýhanı tárbıeleý máselesi qashanda ózekti bolyp keldi. Osyǵan baılanysty, №29 pılottyq balabaqshanyń negizgi róli - jalpyadamzattyq qundylyqtarǵa negizdelgen birtutas pedagogıkalyq protsess qurý arqyly mektepke deıingi balanyń rýhanı-adamgershilik jáne patrıottyq damýyna qolaıly jaǵdaı jasaý bolyp otyr.
Dál osy mektepke deıingi aralyq - balaǵa rýhanı-adamgershilik tárbıe berý úshin óte yńǵaıly kezeń. Sebebi, bul kezeńde bala aınalany asa sezimtaldyqpen, úlken ásermen qabyldaıdy. Sondyqtan da, jalpyadamzattyq qundylyqtar, rýhanı etalondar men minez-qulyq erejesin qalyptastyrý úshin bul aralyqty ótkizip almaý kerek, dep esepteıdi balabaqsha mamandary.
«Bala ómiriniń alǵashqy 7 jylynda jınaqtalǵan kózqaras onyń tutas ómirine azyq bolady. Biraq, qazirgi ata-analar balalardyń rýhanı damýyna múmkindik bermeı, erte jastan ıntellektin damytýǵa basymdyq berip júr. Olarǵa balasynyń mektepke barǵansha áripterdi bilýi, aǵylshyn tilinde sóıleýi jáne jaza bilýi mańyzdy. Óı-óreni qýyp júrgende, kishkentaı adamnyń rýhanı-adamgershilik damýy kóleńkede qalady. Onsyz barlyq satyp alynǵan bilim túkke aspaı qalady, balanyń emotsıonaldy-rýhanı jetilmeý máselesi týyndaıdy», - deıdi L. Raqymjanova.
Jıynǵa qatysqan Halyqaralyq aqparattandyrý akademııasynyń akademıgi, «Ózin-ózi taný» rýhanı-adamgershilik bilim berý baǵdarlamasynyń treneri Sáýle Qojamuratova da balanyń oı-órisinen bólek, emotsııalyq-rýhanı damýyna da kóńil bólý qajettigin basa aıtty.
«Sońǵy ýaqytta IQ (Zııatkerlik koeffıtsıenti) týraly kóp aıtamyz, biraq IQ eshqashan baqytty ómirdiń negizi bola almaıdy. Qanshama aqyldy adamdar ómirden óz ornyn taba almaı ketti. Tabystarǵa jetý úshin jalǵyz bilim jetkiliksiz, odan bólek ómirge beıimdelýdi úırený kerek. Mınıstrlikte jumys istegenimde shetelde oqyǵan, úsh dıplomy bar myqty mamandardy kórdim. Biraq, adamdarmen til tabysa almaı, jumystan shyǵyp ketetin. Sol sebepti, álemde joǵary IQ-den bólek, EQ - emotsıonaldy zııatkerlikke basymdyq berilip otyr. Ózin jaqsy túsingen adam, óz sezimderin júgendeı bilgen adam naǵyz tabystylardyń qatarynan kórinedi. Muny Elbasy óziniń «Bolashaqqa baǵdar: Rýhanı jańǵyrý» maqalasynda erekshe atap kórsetti», - deıdi Sáýle Qojamuratova.
Balabaqsha meńgerýshisi balany erte jastan jalpyadamzattyq qundylyqtarǵa úıretýdiń adamgershilik, ózin-ózi taný, daralyq pen patrıottyq negizin qalaýǵa kómektesetinin aıtty.
«Jyl saıyn balalardy rýhanı-adamgershilik, patrıottyq tárbıeleýdiń - uzaq ári kúrdeli protsess ekenine kóz jetkizip kelemiz. Munda otbasy men balabaqshanyń birlesip kúsh salýy arqyly oń nátıjege qol jetkizip, ár balany óz otanynyń patrıoty etip tárbıeleı alamyz», - dep óz sózin túıindedi meńgerýshi.
«Aq qaıyń» - 1964 jyly Tselınograd qalasynda ashylǵan tuńǵysh qazaqtildi balabaqsha. Qazirgi ýaqytta bul mekemede 3-7 jas aralyǵyndaǵy 142 bala rýhanı-adamgershilik jáne patrıottyq baǵytta tárbıelenip jatyr.
