Balaǵa ómir syılap ketti: Elordada erlikpen kóz jumǵan serjant marapattaldy
Marapattaý rásimi QR Qarýly kúshteri Áýe qorǵanys kúshteri bas qolbasshylyǵynyń basqarmasynda ótti. Rásim aldynda zalda Qazaqstan Respýblıkasynyń Memlekettik ánurany shyrqalyp, sodan keıin bas shtabtyń bastyǵy - QR QK ÁQK bas qolbasshysynyń orynbasary general-maıor N.Muqanov Qazaqstan Respýblıkasy Prezıdentiniń Jarlyǵyn oqydy.
«Adam ómirin qutqarýǵa qatysty syn saǵaty soqqan kezde erlik pen qaısarlyq tanytqany úshin kishi serjant Raıymqulov Erlan Toqtarbaıuly qaıtys bolǵannan keıin «Erligi úshin» medalimen, óz ómirine tóngen qaýipti elemeı, adam ómirin qutqarýda batyldyǵy men janqııarlyǵy, jankeshtiligi úshin «Tótenshe jaǵdaıdaǵy erligi úshin» tósbelgisimen marapattalsyn», - delingen Jarlyqta.
Marapatty qaıtys bolǵan áskerı qyzmetshiniń zaıybyna Áýe Qorǵanys kúshteriniń Bas qolbasshysy, avıatsııa general-maıory N.Karbenov tabystady.
«Erlannyń erligi - árbir qazaqstandyqqa úlgi. Erlikti qyzmettik mindet kezinde ǵana emes, kez kelgen jaǵdaıda tanyta bilýge bolady. Syn saǵatta Erlan óz tańdaýyn jasady - erlik jolyn tańdady. Ol jas bolsa da, batyldyǵymen jas balaǵa ómir syılap ketti. Óz erligimen ol er jigittiń qandaı bolýy kerektigin belgilep berdi», - dedi QR QK ÁQK bas qolbasshysynyń orynbasary T.Qoıshyǵulov.
Óz kezeginde kishi serjanttyń anasy Rızagúl Nazarbekova kóz jasyna erik berip, ulyna kórsetilip jatqan qurmetke alǵysyn bildirdi.
Eske sala keteıik, qaıǵyly oqıǵa 10 mamyr kúni saǵat 12-10-da Esil ózeniniń «Gazmashapparatýra» saıajaı aýmaǵynda bolǵan. Itiniń sońynan sýǵa sekirip, batyp kete jazdaǵan 2007 jyly týǵan qyzǵa alǵashqy medıtsınalyq kómek kórsetildi. Ózen saǵasynda balyq aýlap otyrǵan jigittiń arqasynda qyz aman qaldy. Ókinishke qaraı, qyzdy qutqarǵan 1981 jyly dúnıege kelgen azamat aǵysqa tótep bere almaı, sýǵa batyp ketti.
