Balaǵa qandaı jaǵdaıda vaktsına salýǵa bolmaıdy — dáriger jaýaby

ASTANA. KAZINFORM — Astanadaǵy № 5 qalalyq emhana dırektorynyń orynbasary, pedıatr Olga Inıakına qandaı jaǵdaıda balaǵa vaktsına egýge bolmaıtynyn aıtty.

— Vaktsınalaýdyń basty qaǵıdalarynyń biri qaýipsizdik jáne dáleldengen joǵary tıimdiligi bolýy kerek. Qaýipsizdik jaıly aıtqanda ekpe alýshy tulǵany onyń vaktsınaǵa barlyq qarsy kórsetkishterin eskere otyryp irikteý máselesine mán beremiz. Men shyn máninde keıbir ekpege qarsy kórsetkishter baryn atap ótkim keledi. «Turaqty qarsy kórsetkish» degen uǵym bar, vaktsınanyń barlyq túrine qarsy áser kórsetýdi aıtady. Birinshi túrinde, ondaı balaǵa ekpe salǵan soń 48 saǵatta ystyǵy 40 gradýstan asa kóteriledi. 3-4 saǵat toqtamaı jylaýy, sińiri tartylýy múmkin. Ekinshi bir túri vaktsına salǵannan soń 24 saǵattyń ishinde baıqalady, ıaǵnı bala anafılaktıkalyq shok alýy múmkin, — dedi pedıatr.

Sondaı-aq, dáriger budan bólek keıbir aýrý kezinde de balaǵa vaktsına alýǵa bolmaıtynyn atap ótti.

— Entsefalıt, menıngoentsıfalıt dertiniń kesirinen ortalyq nerv júıesi zaqymdanǵan jaǵdaıda vaktsına salýǵa tek jazylǵanynan 1 jyl ótken soń ǵana ruqsat beriledi. Jiti glomerýlonefrıt degen syrqat bar, bul búırektiń qaýipti aýrýy. Oǵan shaldyqqan bala jazylǵan soń 6 aıdan keıin ǵana vaktsına ala alady. Sozylmaly aýrýlary bar balalarǵa da ekpe aýrýdyń beti qaıtqan kezinde ǵana salyný kerek, — dedi Olga Inıakına.

Buǵan deıin elimizde balasyna vaktsına saldyrmaıtyn ata-ana kóbeıip kele jatqanyn jazǵan edik. 

Sondaı-aq, vaktsınalaýdyń arqasynda elimiz 34 jylda qandaı kórsetkishterge qol jetkizgenin habarlaǵan edik.