Balaǵa dárýmendi dáriger taǵaıyndaýy kerek – maman
ALMATY. QazAqparat - Balaǵa dárýmendi dáriger taǵaıyndaýy kerek. Bul týraly onlaın brıfıng barysynda Almaty qalalyq balalar klınıkalyq juqpaly aýrýlar aýrýhanasy bas dárigeriniń orynbasary Aınur Ýálıeva aıtty, dep habarlaıdy QazAqparat tilshisi.
«Balalardyń, tipti, eresekterdiń aǵzasy ártúrli dárýmenge ártúrli jaýap qaıtarýy múmkin. Sondyqtan, dál osy dárýmen koronavırýstyń aldyn alady, alyp ishý kerek dep aıta almaımyz, sebebi dárýmenniń ózi ár adamǵa jeke taǵaıyndalýy tıis. Eger balada qannyń azdyǵy nemese soǵan beıimdilik bolsa, dárýmen jetkiliksizdiginiń belgileri baıqalsa mindetti túrde jergilikti dárigerge baryp, tıisti zerthanalyq tekseristen ótip, rastalǵan jaǵdaıda dárýmen ishý taǵaıyndalady», - dedi Aınur Ýálıeva.
Sonymen qatar, ol maýsymdyq aýrýlarmen aýrýhanaǵa túsetin balalardyń sany aıtarlyqtaı azaıǵanyn atap ótti.
«Balalar arasynda koronavırýstan ólim-jitim tirkelgen joq. Jyldaǵydaı maýsymdyq, ınfektsııalyq aýrýlar, enterovırýstyq aýrýlar, jiti respıratorlyq ınfektsııalar kezdesip turady. Alaıda, koronavırýsqa baılanysty biz bir jyldan beri epıdemıologııalyq shekteý jaǵdaılarynda ómir súrip jatqandyqtan qyzylsha, qyzamyq, jelsheshek, kókjótel sııaqty balalar ınfektsııalyq aýrýlarynyń kúrt tómendegenin baıqadyq», - deıdi spıker.
Sóz sońynda dáriger taza aýada serýendeýge, araqashyqtyqty saqtaýǵa shaqyrdy.
