Balaeva: Jańa marapattar óner adamdarynyń eńbegin memlekettik deńgeıde baǵalaýǵa múmkindik beredi

— Sizdermen qýanyshqa toly jaqsy jańalyqty bóliskim keledi. Búgin Prezıdent memlekettik nagradalar tizimine «Shámshi Qaldaıaqov» medali men «Qazaqstannyń eńbek sińirgen sýretshisi» qurmetti ataǵyn engizý týraly sheshim qabyldady.

Mádenıet pen óner salasy úshin mańyzdy ári kópten kútken osynaý sheshim úshin elimizdiń búkil mádenıet salasy ókilderi atynan Memleket basshysyna shynaıy alǵysymdy bildiremin!

Bul máni zor sheshim — mádenıet pen ónerdiń qoǵamdaǵy mártebesin arttyrýǵa, osy salaǵa bar ǵumyryn arnaǵan azamattardyń eńbegin laıyqty baǵalaýǵa baǵyttalǵan júıeli memlekettik saıasattyń jalǵasy dep bilemin, — dep jazdy Aıda Balaeva.

Búginde elimizdiń mádenıet salasynda 56 myńnan astam maman eńbek etedi.

— Elimizde 85 teatr, 286 mýzeı, 67 kontserttik uıym jáne 3054 mádenı-demalys uıymy jumys isteıdi. Bul sandardyń artynda ulttyq mádenıettiń damýyna talmaı eńbek etip júrgen qanshama adamnyń qajyrly qyzmeti tur.

Olardyń eseli eńbegi ulttyq ónerdi órkendetip, mádenı muramyzdy saqtap, ony keıingi urpaqqa jetkizýge qyzmet etip keledi.
Sondyqtan mundaı eńbek memlekettik deńgeıde laıyqty baǵalanýǵa tıis ekeni sózsiz.

Búgingi sheshimge jańa Konstıtýtsııanyń qabyldanýy da erekshe mán beredi. Tarıhı-mádenı murany saqtaý jáne ulttyq mádenıetti qoldaý alǵash ret memlekettiń negizgi qaǵıdattarynyń qataryna qosylyp, konstıtýtsııalyq deńgeıde bekitildi, — dedi ol.

Prezıdent atap ótkendeı, endi mádenıet salasyn qoldaý — memlekettiń konstıtýtsııalyq mindeti.

— Bul norma qazirdiń ózinde naqty mazmunmen tolyǵyp keledi. Keıingi bes jylda mádenıet qyzmetkerleriniń jalaqysy eki ese ósti. Bıyldan bastap óner qaıratkerlerine beriletin memlekettik stıpendııalardyń kólemi de eki ese artty. Jyl saıyn mundaı stıpendııany 75 azamat alady, — dep jazdy Aıda Balaeva.

Aıda Balaevanyń málimetinshe mádenıet uıymdarynyń qyzmetkerlerine 260 páter berildi.

— Memleket basshysynyń qoldaýymen mádenıet uıymdarynyń qyzmetkerlerine 260 páter berildi. Onyń 200-i Astana qalasynda bolsa, 60 páter Almaty qalasynda tabystaldy. Bıyl tek Mádenıet pen óner qyzmetkerleri kúnine oraı memlekettik nagradalarmen júzden astam áriptesimiz marapattaldy.

Memlekettik deńgeıdegi baǵalaý júıesi de kezeń-kezeńimen jańaryp keledi. «Halyq ártisi» qurmetti ataǵy otyz jyldan keıin qaıta jańǵyrtyldy. Endi bul tizim «Shámshi Qaldaıaqov» medali jáne «Qazaqstannyń eńbek sińirgen sýretshisi» qurmetti ataǵymen tolyqty.

Shámshi Qaldaıaqov atyndaǵy medal ulttyq mýzykany, kompozıtorlyq pen oryndaýshylyq ónerdi damytýǵa eleýli úles qosyp júrgen azamattardyń eńbegine beriletin joǵary baǵa bolmaq.

Al «Qazaqstannyń eńbek sińirgen sýretshisi» qurmetti ataǵy ulttyq beıneleý óneriniń damýyna eleýli úles qosqan sýretshilerdiń, grafıkterdiń, músinshilerdiń jáne basqa da beıneleý óneri ókilderiniń eńbegin memlekettik deńgeıde laıyqty baǵalaýǵa múmkindik beredi, — dedi ol.

Ol jańa marapattar — Prezıdenttiń mádenıet salasyna degen aıryqsha nazaryn jáne óner adamdaryna jan-jaqty qoldaýyn taǵy bir dáleldeı túsetindeı dedi. 

— Bul áriptesterimizdiń kóp jylǵy shyǵarmashylyq eńbeginiń laıyqty baǵasy bolyp, mádenıet salasynyń jańa býynyna tyń serpin bereri sózsiz.

Qurmetti áriptester, barsha mádenıet salasy ókilderi atynan Memleket basshysyna taǵy da zor alǵysymdy bildiremin. Bul — barshamyz úshin shyn máninde úlken oqıǵa. Mádenıet pen óner adam janyn emdeıdi, rýhanı baıytady, ómirdi súıýge, jaqsylyq pen izgilikke jeteleıdi.

Osy turǵyda Memleket basshysynyń mádenıetti damytýǵa erekshe basymdyq berip otyrǵany biz úshin zor qýanysh, — dep jazdy Balaeva.

Aıta ketelik Prezıdent Qasym-Jomart Toqaev memlekettik nagradalar tizimine «Shámshi Qaldaıaqov» medali men «Qazaqstannyń eńbek sińirgen sýretshisi» qurmetti ataǵyn engizý týraly sheshim qabyldaǵan edi.

QR Premer-Mınıstriniń orynbasary — Mádenıet jáne aqparat mınıstri Aıda Balaeva