Balaeva pornosaıttar jaıynda: Birin buǵattasań, ekinshisi ashylyp jatady
ASTANA. KAZINFORM – Jyl basynan beri elimizde pornografııalyq materıaldar taratatyn 1 024 ınternet-resýrs buǵattaldy. Bul týraly Mádenıet jáne aqparat mınıstri Aıda Balaeva aıtty.
- Statıstıkalyq málimetterge júginer bolsaq, 2019 jyly pornografııalyq materıaldar taratyp, ıntımdik qyzmetterdi jarnamalaıtyn 8 ınternet-resýrs buǵattalǵan edi. 2021 jyly mundaı 624 ınternet-resýrs áshkere boldy. Al jyl basynan 1 024-i anyqtaldy, ıaǵnı kóbeıip barady. Ózderińiz de túsinesizder, biz buǵattaǵan sátten-aq kelesisi ashylyp jatady. Sondyqtan jumysymyzdy jetildirý baǵytynda jumys isteýimiz qajet, - dedi ol Aqordada BAQ ókilderine bergen suhbatynda.
Sonymen qatar mınıstr Ulysmedia bas redaktory Samal Ibraevaǵa qatysty kıbershabýylǵa qatysty pikir bildirdi.
- Kinálilerdi tek quqyq qorǵaý organdary ǵana anyqtaıdy. Keshe mınıstrdiń (Іshki ister mınıstri Erjan Sádenov - red.) pikirin estidim. Іs qozǵalǵan sııaqty. Kinálilerdi izdep jatyr, - dedi Aıda Balaeva.
Aıta keteıik, qazirgi ýaqytta Memleket basshysy Qasym-Jomart Toqaev pen elimizge resmı saparmen kelgen Slovakııa Premer-mınıstri Robert Fıtso joǵary deńgeıde kelissóz júrgizip jatyr.