Balaeva: Mádenıet — memlekettiligimizdiń rýhanı tiregi, halqymyzdyń tarıhı sanasy
ASTANA. KAZINFORM — Premer-mınıstriniń orynbasary – Mádenıet jáne aqparat mınıstri Aıda Balaeva mádenıet jáne óner qyzmetkerlerin kásibı merekesimen quttyqtady.
— Sizderdi kásibı merekelerińizben shyn júrekten quttyqtaımyn! Mádenıet — memlekettiligimizdiń rýhanı tiregi, halqymyzdyń tarıhı sanasy men ulttyq bolmysynyń aıqyn kórinisi. Qoǵamdy ortaq qundylyqtar tóńiregine uıystyryp, eldiń rýhanı tutastyǵyn bekemdeıtin qýatty kúsh.
Búginde jańa Konstıtýtsııa aıasynda mádenıetke, bilimge, ǵylym men ınnovatsııaǵa aıryqsha mán berilip otyr. Bul mádenıet salasynyń aldyna jańa mindetter qoıyp, damýdyń tyń múmkindikterin ashty. Endigi maqsat — baı muramyzdy uqypty saqtaýmen qatar, zamanaýı formattardy, tsıfrlyq sheshimderdi, kreatıvti ındýstrııalardy jáne kórermenmen, oqyrmanmen, jalpy jurtshylyqpen jumys isteýdiń jańa tásilderin batyl damytý, — dedi Aıda Balaeva.
Ótken jyly 61 mádenıet nysanynyń qurylysy bastalyp, 252 nysan jóndeýden ótti. Bıyl taǵy 64 nysannyń qurylysy jalǵasyp jatyr.
— Memleket basshysy mádenıet salasyn órkendetýge, shyǵarmashylyq adamdaryna qoldaý kórsetýge jáne salanyń ınfraqurylymyn nyǵaıtýǵa udaıy erekshe kóńil bólip keledi. Osy júıeli saıasattyń nátıjesinde sońǵy jyldary mádenıet jáne óner qyzmetkerleriniń mártebesin arttyrýǵa, eńbek jaǵdaıyn jaqsartýǵa, óńirlerdegi mádenıet mekemelerin damytýǵa jáne azamattardyń mádenı ıgilikterge qoljetimdiligin keńeıtýge baǵyttalǵan mańyzdy sharalar júzege asyryldy.
Prezıdent tapsyrmasyna sáıkes birqatar jetekshi mádenıet mekemelerine «Ulttyq» mártebesi berildi. Bul olardyń qoǵamdaǵy ornyn nyǵaıtyp, qyzmetkerlerdiń eńbekaqysyn arttyrýǵa múmkindik ashty. Ótken jyly 61 mádenıet nysanynyń qurylysy bastalyp, 252 nysan jóndeýden ótti. Bıyl taǵy 64 nysannyń qurylysy jalǵasýda. Tsıfrlyq damý baǵytynda da naqty nátıjeler bar. Búginde E-Museum platformasy 284 mýzeıdi biriktirip, 65 myńnan astam jádiger men 750-ge jýyq 3D-artefaktini qamtyp otyr, — dedi ol.
Aıda Balaeva mádenıetke kún saıyn adal qyzmet etip júrgen barsha azamattarǵa erekshe alǵys aıtty.
— Qazirgi ýaqytta mádenıet salasy burynǵydan da ashyq, jańashyl ári halyqqa jaqyn bola tústi. Elimizdiń barlyq 20 óńirinen 600 mádenıet qyzmetkeri qatysqan «Mádenıet jáne ınnovatsııa» forýmy osy salanyń zor áleýetin, mamandardyń jańarýǵa daıyn ekenin jáne mýzeıler, kitaphanalar, arhıvter, mádenıet úıleri, teatrlar men kontserttik uıymdar úshin naqty ári tıimdi sheshimder usynýǵa degen ortaq umtylysty aıqyn kórsetti.
Osy mereıli kúni mádenıetke kún saıyn adal qyzmet etip júrgen barsha azamattarǵa erekshe alǵys aıtqym keledi. Ártisterge, mýzykanttarǵa, kitaphanashylarǵa, mýzeı jáne arhıv qyzmetkerlerine, rejısserlerge, sýretshilerge, horeograftarǵa, sahna maıtalandaryna, pedagogterge, tehnıkalyq mamandarǵa jáne elimizdiń rýhanı baılyǵyn saqtap, damytyp júrgen barlyq sala ókilderine shynaıy rızashylyǵymdy bildiremin.
Sizderdiń eńbekterińiz ulttyń rýhanııatyn baıytyp, jas urpaqtyń dúnıetanymyn qalyptastyrady, el birligin nyǵaıtady jáne Qazaqstannyń álemdik mádenı keńistiktegi bedelin arttyra túsedi.
Aldaǵy ýaqytta da ıgilikti joldaǵy qyzmetterińiz tabysty bolyp, jurtshylyqtyń ystyq yqylasy men qoshemetine bólene berińizder.
Barshańyzǵa zor densaýlyq, shyǵarmashylyq shabyt, tolaıym tabys, otbasylaryńyzǵa amandyq tileımin, — dedi Balaeva.
