Balaeva: Qoǵam úshin jaǵymdy jáne tanymdyq aqparattyq keńistik qalyptastyrý qajet
«Jumystyń tıimdiligi, eń aldymen, oǵan jasalǵan jaǵdaıǵa baılanysty. Tájirıbe kórsetip otyrǵandaı, qaı jerde ákim «Rýhanı jańǵyrýdy» durys túsinip, jumysty jeke baqylaýyna alsa, sol óńirlerde baǵdarlamanyń nátıjeligi de joǵary. Mysaly, Almaty, Qostanaı oblystarynda júıeli jumys kórinip tursa, Mańǵystaý, Batys-Qazaqstan sııaqty óńirlerde bulaı aıta almaısyń. Sondyqtan da, oblystarda jańadan qurylǵan «Rýhanı jańǵyrý» memlekettik mekemelerin materıaldyq-tehnıkalyq turǵydan da, kásibı maman tartý jaǵynan da turaqty qoldaýy qajet» , - dedi mınıstr.
Onyń atap ótýinshe, elimizde bolyp jatqan sońǵy oqıǵalar áleýmettik jelilerdi qoldaný mádenıetin damytýdyń ózekti ekenin kórsetti.
«Qoǵam úshin jaǵymdy jáne tanymdyq aqparattyq keńistik qalyptastyrý qajet. Bul oraıda aqparatty jyldam jetkizýdiń mańyzy zor. Sondyqtan da, «Rýhanı jańǵyrý» jobalaryna jaýapty barlyq memlekettik organdarǵa birinshi kezekte ınternet keńistiginde, áleýmettik jeli paraqshalarynda jumysty kúsheıtý kerek « , - dedi Aıda Balaeva.
Eske sala keteıik, Memlekettik hatshy Qyrymbek Kósherbaevtyń tóraǵalyǵymen ótken komıssııa otyrysynda «Rýhanı jańǵyrý» baǵdarlamasyn odan ári tereńdetip, Ulttyq jańǵyrý kezeńine ótkizýdiń arnaıy Jol kartasyn jasaý qajet degen sheshim qabyldandy. Bul qujat asa mańyzdy ulttyq joba retinde júrgiziledi.
Ulttyq jańǵyrý jobasynyń eń basty máni – ulttyń básekege qabiletin arttyrý. Bul – ulttyq jańǵyrýdyń strategııalyq maqsaty bolyp qalady.
Jol kartasynda Memlekettik til mártebesin arttyrý, Bilim jáne ǵylymdy damytý, Joǵary ulttyq jáne jalpyadamzattyq qundylyqtar negizinde rýhanı-adamgershilik jáne patrıottyq tárbıe berý, Eńbek adamyn qalyptastyrý, Aýyldy túletý sııaqty keshendi is-sharalar qamtylady.
Memlekettik hatshy otyrysty qorytyndylaı kele, «Rýhanı jańǵyrý» baǵdarlamasynyń basym baǵyttary boıynsha jumysty odan ári jandandyrý boıynsha naqty tapsyrmalar berdi.
